Milliy Meclis reisi: Qırımtatarlar ayırımcılarğa qarşılıq köstermege azırlar

16 Fevral 2014

Milliy Meclis reisi Refat Çubarov qırımtatar halqı Qırımnı Ukrainadan ayırmağa istegen ayırımcı küçlerge qarşılıq köstermege azır olğanlarını qayd etti.

Bu aqta o, ZN.UA. Agentligine izaat berirken bildirdi.

“Ukrain siyasetçileriniñ qabaatı sebebinden öz yurtunda aqları alâ daa ğayrıdan tiklenilmegenine baqmadan qırımtatarlar Qırımnı Ukrainadan ayırmaq tırışuvları aqibetinde Qırım ve onıñ sakinlerine qazağa oğratılacağını yahşı añlağanlaylar, – dedi Meclisniñ yolbaşçısı.

“Qırım hususında ekspansion ğayelerni taşığan er angi insanlar qırımtatarlardan munasip qarşılıq cevabını alırlar, – dedi Çubarov.

Şunı hatırlatamız ki, Qırım Yuqarı Şurasınıñ sessiyasında muhtariyet parlamenti Qırım Anayasasına deñişmeler kirsetmek teşebbüsinen çıqtı.

Regional Vladimir Klıçnikovnıñ sözlerine köre memlekette bugünki vaziyet ve “milliy faşist gruppalarnıñ akimiyetke kirmek areketleri” şaraitinde, deputatnıñ fikrince Qırımnıñ muhtar statusını yoq etmege tırışqan vaqıtta Qırım Anayasasına deñişme kirsetmek ve Rusiye prezidenti Pütinge muracaat etmek zarur.

Fevral 7 künü 1000-ge yaqın narazılar Kiyevde Devlet Telükesizligi komiteti qarşısına çıqıp komitet yolbaşçılarından Qırım Yuqarı Şurasınıñ ayırımcılıq beyanatlarını taqiq etmekni talap ettiler.

Ukraina Telükesizlik hızmeti Ukraina bütünligine toqunmağa azırlıq munasebetinen cinaiy iş açtı.