Milliy Meclis delegatsiyasi Almaniyada

29 Mart 2011

İyün 27-28 künleri Milliy Meclisniñ Qırımtatar halqı Meclisiniñ reisi, Ukraina halq deputatı Mustafa Cemilev reberligindeki delegatsiyası iş ziyaretinen Almaniyada bulundı. Delegatsâiınıñ erkânına Bütündünya qırımtatarlar kongressiniñ prezidenti, Milliy Meclis reisiniñ birinci muavini Refat Çubarov, Meclisniñ tışqı alâqalar bölüginiñ başı Ali Hamzin, sabıq sovetler hududında bugünki milliy siyasiy ceryanlarnıñ tedqiqatçısı, professor Svetlana Çervonnaya ve Milliy Meclis reisiniñ yardımcısı Lilâ Müslimova kirdiler.

Ziyaret “Alman-qırımtatar dialogı” programması çerçivesinde Almaniyanıñ Şarqiy Avropa ile emekdaşlıq birliginiñ daveti boyunca amelge keçti. Ziyaret programmasını tizüvde ve onı kerçekleştirüvde Almaniyanıñ “Ğayıp oluv telükesi altında bulunğan halqlarnıñ uquqlarını qorçalav boyunca cemiyet”, Kavkaz, Tatarika ve Turkestan tedqiqatları boyunca institut, “Tatarlar Doyçland”, “Tamğa” kibi bir sıra teşkilâtları yardımcı oldılar.

Eki künlük iş ziyareti devamında Milliy Meclis delegatsiyasınıñ azaları Almaniya parlamenti – Bündestag, Tışqı işler nazirligi, İçki işler nazirligi, Almaniyada çalışqan elçiliklerniñ, ükümetten tış alman teşkilâtları, fond ve teşebbüsçi gruppalarnıñ vekillerinen resmiy sürette körüştiler.

Qırımtatar delegatsiyasınıñ iş ziyareti Avropa Akademiyasında informatsion aqşam ile yekünlendi. Aqşamda Milliy Meclis reisi Mustafa Cemilevniñ maruzasından soñ tedbir iştirakçileri olarnı meraqlandırğan Qırım ve qırımtatar halqınıñ vaziyeti ile bağlı suallerine cevap almaq, muzakere etilgen meseleler boyunca öz fikirlerini bildirmek imkânına malik oldılar.

Milliy Meclisniñ Almaniyağa iş ziyareti Bütündünya qırımtatar kongressi ve Milliy Meclisniñ Almaniyadaki temsilcisi Ahmet Ozay tarafından ziyaretniñ bütün tedbirlerine tehnikiy ceetten qoltutuvı, Ğarp Avropa Qırımtatar medeniyet ve yardımlaşma cemiyetiniñ reisi Rafet Qaranlıq, Almaniyada qırımtatar diasporasınıñ faalleri, Köln şeerinde yaşağan iş adamı Abdulla Yücesan, Köln şeer şurasınıñ deputatı Erhan Qara ve diger almaniyalı semetdeşlerimizniñ yardımı sayesinde semereli ve mahsuldar keçti.