Milletlerara dava qozğağanı içün mesülietke çekilsin!

04 Iyül 2012

2012 senesi iyül 4 künü Aqmescitte “Adliyeciler Aqyar ve Tavrida rus teşkilâtları koordinatsion keñeşiniñ yetekçisi V.L. Tüninni Qırım telekanallarınıñ birinde milletler arasında dava qozğağanı içün cevapkârlıqqa çekmekni talap eteler” mevzusında matbuat konferentsiyası olıp keçti.

Matbuat konferentsiyasını teşkil etken adliyeciler Teyfuq Ğafarov ve Rustem Osmanov jurnalistlerge ATR kanalında 2012 senesi iyün 29-da “Gravitatsiya” programmasında olğan vaqianı tarif ettiler.

“ATR kanalında 2012 senesi iyün 29-da “Gravitatsiya” programması vaqtında, – dedi Teyfuq Ğafarov, – mezkür telekanalnıñ seyircileri esasen qırımtatarlardan ibaret olğanını pek yahşı bilgen Aqyar ve Tavrida rus teşkilâtları koordinatsion keñeşiniñ yetekçisi V.L. Tünin, bizim fikrimizce, milletler arasında dava qozğağan sözlerni ayttı”.

Matbuat konferentsiyasında Teyfuq Ğafarov Vladimir Tüninniñ şovinistik sözleri boyunca prokuraturağa muracaat etmek qararını ilân etti. 2012 senesi iyül 3 künü adliyeciler Qırım Pokuraturasına muracaat etip, Ukraina Cinaiy Kodeksiniñ 1-nci qısım 161-nci maddesinde közde tutulğan cinayet yapılğanı yani “insanlarnıñ ırqıy, milliy mensüpligi ve diniy itiqadına köre aqları bozulğanı” aqqında ariza berdiler.

T. Ğafarov qayd etti ki, Ukraina Cinaiy Kodeksiniñ 1-nci qısım 161-nci maddesi milletlera dava qozğaması içün cevapkârlıqnı közde tuta. Matbuat konferentsiyasında Teyfuq Ğafarovnıñ bildirgenine köre Ukrainada mezkür madde boyunca 30-ğa yaqın cinaiy iş açılğan. Eger Vladimir Tüninniñ areketleri qanunğa zıt dep tanılsa, nasıl cezalanacağı aqqındaki sualge adliyeci: “Er şey qabaatnıñ derecesine bağlı. Ceza cöreme ya da azatlıqtan marum etüv kibi olabilir”, dep cevap berdi.

Matbuat konferentsiyanıñ soñunda Rustem Osmanov bildirdi ki, prokuratura ve uquqkoruyıcı organlar ileride milletler arasında dava qopmasına alıp kelecek areketlerge yol bermemeleri içün adliyeciler tarafından bütün çareler körülecek. Adliyeciniñ aytqanına köre Ukraina Cinaiy Kodeksiniñ 161-nci maddesi boyunca prokuraturağa ariza yamaq aqqında olarğa muracaat etken er bir insan yardım alabilir.

Şunı hatırlatmalı ki, 2012 senesi iyül 3 künü Cemaat gumanitar keñeşniñ toplaşuvında devletniñ başı V. Yanukoviç uquqqoruyıcılardan milletlerara davalarnıñ sebepçilerine nisbeten pek sert yanaşmaqnı talap etti.

“Milliy duyğularnı qıtıqlap qavğa çıqarmaq areketleriniñ ögüni kesen-kes almalı”, – dedi o.

“Devletniñ yolbaşçısı olaraq, şunı söylemek isteyim ki, milliy azlıqlarğa mensüp insanlarnıñ aqlarını qorçalav işi daima qattı nezaret altında olacaq”,- qayd etti Prezident, dey onıñ matbuat hızmeti.