Merkeziy saylav komissiyasınıñ başı Zair Smedlâyev 6 çağırılış Qurultayğa saylavlarnıñ neticelerini seslendirdi

19 Iyün 2013

2013 senesi iyün 19 künü Merkeziy saylav komissiyasınıñ reisi Zair Smedlâyevniñ 6 çağırılış Qurultayğa Qırım ve Ukrainada saylavlarnıñ neticeleri boyunca matbuat konferentsiyası ötkerildi.

Onda reis muavini Nazim Memetov ve kâtibi Alim Zeytullayev da iştirak ettiler.

“Bugünge qadar Qurultay delegatlarını saylavlar Ukraina ve Qırımda olıp keçtiler, – dep başladı tedbirni Zair Smedlâyev. – 46 saylav dairesinden faqat 1-i yurt tışında yani Özbekistan Cumhuriyetinde bulunmaqta.

Umumen alğanda ise saylavlar yekünlendi”. Komissiya reisiniñ aytqanına köre saylav uçastkalarında 3,5 biñ semetdeşimiz işke celp etildi. “Adamlar maaş almadan göñülli çalıştılar, çoq sağ olsunlar”, dedi Smedlâyev.

Zair Smedlâyev qayd etkenine köre, saylavlarnı firqalar ve halqara teşkilâtlarnıñ, Ukraina saylavcılar komiteti, Amerikanıñ Ukrainadaki Elçiligi, açıq demokratiya komiteti ve Halqara cumhuriyet merkezi vekillerinden 800 adam nezaret etti.

Merkeziy saylav komissiyasınıñ malümatlarına köre saylavlarda 90 biñ 850 adam, yani saylavcılarnıñ 50 fayızı iştirak etti. 2013 senesi iyün 19-ğa qadar elde etilgen neticelerge köre Qurultayğa 4 fayızlı dereceni keçken yani 3634 ve ondan ziyade rey qazanğan 7 cemaat teşkilâtı ve blokları keçti.

Olar arasında – “Maarifçi” (4587rey), “İnkişaf” (11861), “Adalet” (5197), “Milliy Haq” (29376), OKND (8382), “Qardaşlıq-Qarasu – Qırımtatar Yaşlar merkezi” (6901), “Küreş” (6728).

Qurultayda olar şu qadar mandat qazandılar:

“Maarifçi” 4 ,

“İnkişaf” – 8,

“Adalet” – 4,

“Milliy Haq” – 18,

OKND – 6,

“Qardaşlıq-Qarasu – KMTs” – 5,

“Küreş” – 5.

Zair Smedlâyev majoritar dairelerde saylavlarnıñ neticelerini de seslendirdi. Onıñ sözlerine köre 198 delegat seçilip, bulardan 21 – qadınlar. Onıñ bildirgenine köre, delegatlarnıñ üçte bir qısmı birinci kere seçildiler. “Qurultayğa yañı delegatlar seçilmesi milliy parlament işiniñ keyfiyetine müsbet tesir etecegine eminim, dedi komissiya reisi.

Nazim Memetov öz nevbetinde saylavlarnıñ ketişatını da tarif etti. “Merkeziy saylav komissiyası ögüne qoyulğan vazifeni eda etebildi ve aşkâr, qanuniy, teşkiliy ve demokratik saylav keçirdi”, – dedi reis muavini.

Onıñ qayd etkenine köre, Ukraina saylavcılar komitetiniñ Qırım bölügi saylavlarnı diqqat ile közetip, başta pek keskin tenqidge alğan olsalar, soñuna kelip “komitetniñ munasebeti bayağı deñişti”. N.Memetov yol berilgen yañlışlarnı da qayd etip, olarnıñ pek az olğanını ayttı.

“Çoqusı allarda bu bülletenlerni pasportsız berilmesi oldı ve biz bunı tanıymız”, – dep añlattı o. Reis muavini şunı da qayd etti ki, saylavlarğa ne bücetten, ne de bir fonddan bir kapik para alınmadı, sadece namzetler bergen ödemeler esabına oldı.

Matbuat konferentsiyanıñ soñunda Zair Smedlâyev delegatlarnıñ cedveli Meclisniñ İnternet saifesinde derc etilecegini bildirdi.