Melitopolde «Vatan asretligi» kitabı taqdim etildi

04 Dekabr 2011

2011 senesi dekabr 3 künü Zaporojye vilâyetiniñ Melitopol şeerinde “Vatan asretligi… Melitopoldeki qırımtatarlarnıñ taqdiri” kitabınıñ taqdimnamesi ötkerildi. Bu kitap Minever İdrisova ( tertipçi), Gülnara Bekirova (kiriş sözüniñ müellifi ve muarrir), Ediye Müslimova (naşir)nıñ çoqyıllıq semereli emekleriniñ mahsulıdır.

Melitopolde yaşağan 100-den ziyade qırımtatar aileleri, facialı taqdirler aqqında ikâyelerden ibaret kölemli kitapta ilk sefer Melitopol ve onıñ rayonında qırımtatar diasporası nasıl şekillengeni tarif etile. “Ömürim Vatan asretliginde keçti” – kitap qaramanları aynı böyle qayğınen yaşaylar.

Müelliflerni hayırlamaq içün T. Şevçenko adına şeer medeniyet evine nufuzlı musafirler – Bütündünya qırımtatarlar kongressiniñ prezidenti, Qırımtatar halqı Meclisi reisiniñ birinci muavini, Qırım Yuqarı Şurasınıñ deputatı Refat Çubarov, Donetsk vilâyeti Ügledar şeeriniñ başı Alim Şirinskiy (kitapnıñ baş sponsorı), Melitopol şeer yolbaşçısınıñ muavini İrina Donets, Zaporojye vilâyet şurasınıñ deputatı Yevgeniy Balitskiy, Melitopol rayon devlet memuriyeti reisiniñ muavini Aleksandr Başa, “Altınay” Zaporojye tatar medeniyeti merkezi idaresiniñ reisi Rahima Ahmerova, Qırım müendislik-pelagogika universiteti rektorınıñ birinci muavini Eskender Lümanov, ülkeşınas, Melitopol sanitariya ekimi Vladimir Reznik, “Maarifçi” birleşmesi Teftiş komissiyasınıñ reisi Beyye İlyasova teşrif buyurdılar.

Kitapnı neşirge azırlağanlar Melitopol qırımtatar diasporasınıñ şekillengenini tarif etmek ğayesinden ta onıñ kerçekleşmesine qadar keçilgen mürekkep yol aqqında ikâye ettiler.

İkâyeleri kitapqa kirsetilgen bir çoq insanlar endi vefat etti, demek kitapnıñ qıymeti daa ziyade arta. Bunıñ kibi de kitapnıñ çıqmasına maddiy yardım köstergenler de unutılmadı.

Tedbirni şeñ oyun ve yırlarınen yaraştırğan “Güzel Qırım” Melitopol halq ansambli salonda sıcaq ve samimiy müit yarattı.