Melitopolde 1987 senesi qırımtatarlarnıñ Moskva vaqialarınıñ 25 yıllığına bağışlanğan aktsiya başlandı

08 Aprel 2012

Moskvada Qızıl meydanda 1987 senesi olıp keçken qırımtatarlarnıñ narazılıq numayışlarınıñ 25 yıllığına bağışlanıp 2012 senesi aprel 7-de Melitopol şeerinde “Öz halqına sevgi ile” birinci aktsiyası başlandı. O uzaq yıllarda bu numayışlarda Melitopolden 50-den ziyade semetdeşimiz iştirak etken edi. Tantanalı tedbir Melitopol şeerindeki Şevçenko adına Medeniyet evinde ötkerildi.

Kontsert programması Zarema Zaretdinova yolbaşçılığındaki “Güzel Qırım” yerli ansamblniñ genç icracıları ve Aqmescitten kelgen “Zaman” ansambl tarafından azırlandı. Sanatçılarnıñ bir çoqunıñ ana-babaları 1987 senesi vaqialarnıñ iştirakçileri olğanlar. Tedbirni Zaporojye regional meclisniñ reisi, Melitopol qırımtatar cemiyetiniñ faali Leyla İbragimova alıp bardı.

Qırımdan tedbirge Qırımtatar halqı Meclisi tışqı alâqalar bölüginiñ başı Ali Hamzin, milliy areket iştirakçisi, Moskva aktsiyası yetekçilerinden biri Bekir Ümerov, bunıñ kibi de Zaporojye regional meclisiniñ reisi Ridvan İbraimov ve belli qırımtatar tarihçısı Gülnara Bekirova keldiler. Aktsiyada şeer akimlerinden şeer golovasınıñ muavini İrina Donets, şeer medeniyet bölüginiñ başı Natalya İvanova, şeer şurasınıñ deputatı Valeriy Lâbah, Ukrainada hızmet köstergen medeniyet hadimi Yekaterina Şişmanova da iştirak ettiler. Musafirler arasında “Altınay” Zaporojye tatar medeniy merkeziniñ reisi Rahima Ahmerova ve Melitopol şeeriniñ diger medeniy merkezlerniñ vekilleri de bar edi.

Tantanalı tedbirni açqan İrina Donets Melitopol şeeriniñ ömürinde qırımtatar cemiyetiniñ büyük rolüni, milletlerara ve dinlerara munasebetlerni pekitüvdeki hızmetlerini ayrıca qayd etti. 1987 senesi Moskva vaqialarınıñ iştirakçilerine muracaat eterek İ.Donets, o aktsiyanıñ qırımtatar halqı içün müim olğanını qayd etti ve qırımtatarlarnıñ diger milletlerge nisbeten sayğı-ürmeti olarnıñ Qırımda ğayrıdan tiklenmesine kefil olur, dedi.

Soñ sanağa köterilgen Ali Hamzin ve Bekir Ümerov Qırımtatar halqı Meclisi adından yubiley tedbirniñ teşkilâtçılarına teşekkür bildirip, qırımtatarlarnı öz özgünligini qorçalamaq içün birlikli olıp, menfiy davranışlarğa qarşı turmağa çağırdılar. Tedbir iştirakçilerini milliy areket veteranı Minever İdrisova ve “Altınay” Zaporojye tatar medeniy merkeziniñ reisi Rahima Ahmerova da selâmladılar.

Tedbirniñ muzıkalı programması çerçivesinde qırımtatarlarnıñ vatanperverlik yırları icra etildi. Halqnıñ sürgünligi ve qaytuvını köstergen horeografik programma, bunıñ kibi de İsmail İbragimov arhivinden alınğan fotoresimler numayışı ise er kesni pek tesirlendirdi. Salonğa kirişte “Vatan asretligi. Melitopol qırımtatarlarınıñ taqdirleri” kitabınıñ sergisi teşkil etildi. Kitapnıñ taqdimi 2011 senesi noyabr 22-de Aqmescitte qırımtatar teatrinde ve soñra dekabr 5-te Melitopolde keçirilgen edi.

Malümat: Bugün Melitopolde tahminen 4000 qırımtatarı yaşay. Zaporojye regional meclisi areket ete, belli ki onıñ azaları Qırımtatarlarnıñ qaytmasına yardım etüv boyunca “Azat” Melitopol regional komitet erkânında faaliyet köstere ediler.