Mehmet Samsar: Haqara forum keçirmek ğayesini pek faydalı, dep sayamız!

21 Noyabr 2013

Türkiye Cumhuriyetiniñ Elçisi başta Milliy Meclisniñ yañı saylanğan azalarını hayırladı.

O qayd etti ki, “qırımtatarlarnen işbirligimiz ep quvetleşe ve mahsuldar olmaqta. Türkiye qırımtatarları ile aqrabadır ve bundan da yaqındır. Biz bu bağlarımıznı Türkiye ve Ukraina arasındaki qaviy bir köpürdir, dep sayamız. Qırımtatarlar faqat Qırımnıñ degil de, bütün Ukraina medeniy baylığınıñ vekilleridir”. Onıñ fikrince Ukraina akimiyeti qırımtatarlarnıñ medeniy inkişafqa qoşqan issesini tanımaqta.

“Daa yaqın keçmişte mustaqilligini elde etken Ukrainağa Sovetler Birliginden asabalıq olaraq diger problemlernen bir sırada qırımtatar halqınıñ problemi de qaldı. Ve bu problemlerni bugün çezmek lâzim. Ukraina ükümeti qırımtatarlarnıñ öz yurtuna qaytarılmasınıñ zarurlığını añlay. Halqara cemaatçılıq, Avropa Birligi qırımtatarlarnen göñüldeştir”, – dedi cenap elçi.

“Qırımtatarlarnıñ qaytarılması ve yerleşmesi içün Ukraina er şeyni yapa. Tahminen 260 biñ qırımtatar qaytıp keldi, biz qırımtatarlarnıñ episi ukrain cemiyetine qatılğanını ister edik. Milliy mensüpligine köre sürgün etilgen şahıslarnıñ aqlarını ğayrıdan tiklegen ve Ukraina parlamentinde çoqluqnıñ qoltutuvını qazanğan qanun leyhasına sevindik. Meclis ve ükümet arasında ağımdaki meselelerniñ çezilmesi zarur olğan maqsadlı dialog da bizlerni sevindirdi. Sentâbr 19 künü Aqmescitte tögerek masa keçirilmesi müim vaqiadır ve biz 2014 senesi Halqara forum keçirmek ğayesini pek faydalı, dep sayamız. Ukraina içün bu daa bir muvafaqiyet tarihı olur”, – dedi Mehmet Samsar.

Elçi şunı da qayd etti ki, Türkiye Ukrainağa qırımtatarlarnıñ qanuniy statusı, mesken meselesiniñ çezimi, milliy yerli memuriyetlerde sayısı artmasını, tasil programmalarınıñ kenişletilmesinde qoltutmağa devam etecek. Halqara cemaatçılıqnıñ yardımı ile qırımtatarlarnıñ meselesi çezilecegine ve olar sotsial-iqtisadiy inkişafnıñ ögünde olacaqlarına kerçekten inanam”.

Hatırlatamız ki, 2013 senesi noyabr 21 künü Kiyevde Meclis yolbaşçılarınıñ diplomatik missiyalar ve Ukrainada akkreditatsiya etilgen halqara teşkilât yolbaşçıları ile eryıllıq 3-nci körüşüvi olıp keçti.

Körüşüvde çet devlet elçilikleri, BMT, Avropa Birligi kibi halqara teşkilâtlar, Migratsiya boyunca halqara teşkilâtnıñ Ukrainadaki temsilciligi, BMT aliy komissarı idaresiniñ Beyazrusiye, Moldova ve Ukraina boyunca temsilciliginiñ 30-dan ziyade vekilleri,

Körüşüvniñ resmiy teşkilâtçısı “Qırım inkişafı fondı” hayriye teşkilâtı, ortağı ise “Qırım Halqara Biznes Birleşmesi” oldılar.