«Meganom» firması Aqmescitteki «Jigulina Roşça» maallesinde narazılıq tarlasını tutıp alacaq oldı

12 Noyabr 2013

Jigulina Roşça maallesindeki tınç narazılıq aktsiyasınıñ iştirakçileri habet etkenlerine köre noyabr 12 künü “Meganom” firmasınıñ vekilleri izin bergen vesiqaları olmadan topraq damartılarnıñ bir qısmını qoraladılar. Mezkür firma evel bu topraqnı almaq meramını bildirmegen edi.

Narazılıq aktsiyasınıñ 100-den ziyade iştirakçisi “Meganom” firmasınıñ böylece işğaline bir kereden seslendi. Bundan da ğayrı, tartışma çıqqan yerge Aqmescit regional meclis reisi Lemar Yunusov, QMC Nazirler şurası yanında topraq komissiyasınıñ azası Zevcet Qurtümerov ve uquqqoruv organları ile yerli akimiyet organlarınıñ vekilleri de yetişip keldiler.
Uzun subetlerden soñ dava yatıştırıldı, lâkin “Meganom” firmasınıñ vekilleri qoranı alıp taşlamaqtan baş çektiler. Neticede narazılıq aktsiyasınıñ

iştirakçileri qoranı özleri yıqmaq zoruna qaldılar. Çatışma aqibetinde aktsiya iştirakçilerinden biriniñ eli yaralandı. QMC Nazirler şurası yanında topraq komissiyasınıñ azası Zevcet Qurtümerov bildirgenine köre mezkür hududnı yalıñız Aqmescit rayon devlet memuriyeti idare etmege aqlı, çünki bu topraq Mirnoye qasabası sıñırınıñ tışındadır.

Yerli sakinlerniñ bergen malümatına köre “Meganom” firmasınıñ vekilleri narazılıq tarlasınıñ iştirakçilerinen körüşip, bu topraqtan vazgeçmelerini teklif etip, yerine başqa massivden topraq bermekni işandırğanlar. Neticede 12 adam bu şartlarğa razı oldı. Amma “Meganom” firması qoralağan yer bayağı çoqça damartılarnı sığdıra.

Mesele açıq qalğanı sebebinden noyabr 12 künü QMC Nazirler şurası yanında topraq komissiyasınıñ azası Zevcet Qurtümerov Mirnıy köy şurası icra komiteti reisiniñ muavini Vasiliy Kurzâba ile körüşti.

Körüşüvde Z. Qurtümerov dedi ki, cenap Kurzâbanıñ Jigulina Roşça maallesinde bulundığı asılında narazılıq tarla iştirakçileriniñ toprağı işğal etilmesine ve bu maallede narazılıq aktsiyasını keçirüv boyunca añlaşmanıñ bozulmasına siltem oldı.

Meclis reisi Refat Çubarov narazılıq tarlası vekillerinen körüşerek telefon vastasınen Qırım Nazirler Şurası Topraq komissiyasınıñ başı Georgiy Psaröv ile bağlandı ve narazılıq tarlasında olıp keçken provokatsion areketler aqqında haber etti. R.Çubarov G.Psarövdan noyabr 18 künü bazarertesi mezkür vaaziyet boyunca Qırım Nazirler Şurası Topraq komissiyasınıñ toplaşuvını keçirmesini rica etti.

Öz nevbetinde narazılıq aktsiyası iştirakçileri bugünden itibaren Jigulina Roşça mallesinde nevbetçilik yapıp başladılar. Meclis reisi Refat Çubarov narazılıq aktsiyası iştirakçilerinen körüşip, kün devamında akimiyet vekillerinen bağ tutqanını bildirdi. Bunıñ kibi de o dedi ki, şu anda Qırımnıñ tışında olğan Qırım Nazirler Şurası reisiniñ muavini, Topraq komissiyasınıñ başı Georgiy Psaröv qaytıp kelgeninen Jigulina Roşça mallesindeki vaziyet Topraq komissiyası toplaşuvında muzakere etilecek.

Malümat içün: 2006 senesinden başlap Mirnıy köy şurasınıñ hududında topraq damartılarını ayıruv boyunca tınç narazılıq aktsiyası areket etmekte. Aktsiyada iştirak etken 391 insan arasında em qırımtatar, em slavân ealisi vekilleri bar. Çoqları endi mında eV qurdılar.