Meclis ve Ukraina TİN beraber iftar keçirdiler

22 March 2025

Saban ayınıñ 21-nde Qırımtatar Milliy Meclisi Ukraina Tış işler nazirliginen beraber TİNi yanındaki Diplomatik akademiyada iftar keçirdi. Davet etilgen musafirler arasında Ukrainada akkreditatsiya etilgen musulman memleketleriniñ Elçileri, cemaat ve USQniñ askerleri bar edi.

İftarda Ukraina tış işler naziri Andriy Sıbiğa, qırımtatar halqınıñ lideri Mustafa Cemilev, Ukraina mudafaa naziri Rustem Umerov, Ukraina Qavmiy siyaset ve vicdan serbestligi boyunca devlet hızmetiniñ reisi Viktor Yelenskıy, Ukraina halq mebusı Tamila Taşeva, Ukrain institutınıñ baş müdiriniñ muavini Alim Aliyev, Qırım musulmanları diniy idaresiniñ müftisi Ayder Rustamov, “Umma” Ukraina musulmanları diniy idaresiniñ müftisi Murat Süleymanov, Qırımtatar Milliy Meclisiniñ azaları, arbiy hızmetçiler ve digerleri iştirak ettiler.

Qırımtatar Milliy Meclisiniñ reisi Refat Çubarov öz çıqışında Ramadan ayı munasebetinen er kesni hayırladı, Ukraina mudafaa ve havfsızlıq quvetleriniñ askerlerine iftar keçirmek imkânı içün minnetdarlığını bildirdi ve 11 yıldır devam etken Rusiye-Ukraina cenki şaraitinde musulman ummasınıñ mahsus birligini qayd etti:

“Ramazan künleri bizler Qırımnı Rusiye işğalcilerinden qurtarmaq ve öz halqımıznen, öz toprağına ve Ukraina devletine sadıq qalğan Qırım sakinlerinen birleşmek qararımıznı daa da quvetleştiremiz.

Soñki vaqıtları Rusiye-Ukraina cenkinde barışıq nasıl areketler ve usullarnen tizile bilecegine dair çeşit türlü açıq versiyalar peyda ola. Bu munasebetnen Ukraina Prezidenti Volodımır Zelenskıy ve onıñ taqım azalarına teşekkür bildirmege ruhset beriñiz. Mında biznen beraber adaletli barışıqqa irişmek içün muzakere esnasını temin etmek maqsadınen Ukrainanıñ halqara ortaqları ile işbirlik içün eyyet azaları – Nazirler Andriy Sıbiğa ve Rustem Umerov bar. Ukraina iç bir vaqıt vaqtınca işğal etilgen topraqlarnı Rusiye olaraq tanımaycağı aqqında açıq-aydın bildirgenleri içün olarğa teşekkür etmek kerek”.

Soñunda Meclis reisi Ukrainağa ğalebe, elçileri tedbirde iştirak etken memleketlerge ise barışıq ve abadanlıq tiledi. Qırım, tamır qırımtatar halqınıñ vatanı ve Ukraina devletiniñ ayırılmaz parçası olğanını hatırlattı.

“Ukraina ve qırımtatar halqı olmadan Qırım aqqında bir şey olmaz”, – dedi o.

Aynı zamanda Tış işler nazirliginiñ yolbaşçısı Andriy Sıbiğa Facebook saifesinde yazdı ki, bu iftar Tış işler nazirligi adından keçirilgen birinci iftar oldı ve 2023 senesi resmiy seviyede başlatılğan Ukraina prezidenti Volodımır Zelenskıynıñ teşebbüsiniñ devamı olacaq.

“Bu iftar Ukrainanıñ birligini, çoq medeniyetli, çoq dinli ve çoq milletli cemiyetimizniñ timsali edi. Em de bunı qorçalağan Ukraina qorçalayıcılarına minnetdarlığımıznı bildiremiz. Ukrainanıñ vaqtınca işğal etilgen topraqlarınıñ, hususan bizim Qırımımıznıñ azat etilmesini yaqınlaştırğan er keske teşekkürler bildiremiz.

Rusiye istilâsı Qırımnen başladı ve Qırımnen bitecek. Yani onıñ Ukraina terkibine qaytmasınen. Bu tek topraq bütünliginiñ ğayrıdan tiklenüvi degil, bu adaletniñ ğayrıdan tiklenüvi. Bugün birligimiz Ukrainanıñ bütünley, adaletli ve devamlı barışıq tiklenmesi içün daa müimdir”, – dep Tış işler naziri yazdı.