Rusiye işğali sebebinden vaqtınca Almaniyada oturğan qırımtatarlarnen körüşti

08.12.2025

2025 senesi ilk qış ayınıñ 6-nda Qırımtatar Milliy Meclisi Rusiye işğali sebebinden Qırımnı terk etmege mecbur olğan ve şimdi vaqtınca Almaniyada oturğan qırımtatarlarnen onlayn körüşüv keçirdi. Subetke evelden qayd etilgen 38 insan qoşuldı.

Meclisten qırımtatar halqınıñ lideri Mustafa Cemilev, Qırımtatar Milliy Meclis reisi Refat Çubarov, Meclis reisiniñ muavini İlmi Ümerov ve Ahtem Çiygöz, em de Meclis azaları Eskender Bariiev, Abmedcit Süleymanov, Riza Şevkiyev ve Gayana Yüksel iştirak ettiler.

Aman-aman üç saat devamında iştirakçiler Almaniyadaki qırımtatarlar yaşayışınıñ aktual meselelerini muzakere ettiler ve ğayretlerniñ birleşüvi, umumiy teşebbüsler ve Meclisnen faaliyetniñ koordinatsiyasınıñ müimligini qayd ettiler.

Körüşüv neticesinde taraflar tekliflerni azırlamağa ve kelecek onlayn körüşüvde dialognı devam etmege añlaştılar. Meclis muzakerelerniñ manalı olğanına qıymet kesti, birdemlik ve işbirlik neticesinde Almaniyadaki qırımtatar cemiyeti milliy areketniñ müim bir qısmı ola bilecegine ümütini bildirdi.