Medeniyeti ve tili yaşar eken, halq da yaşar

30 November 2012

2012 senesi noyabr 29 künü Yalta şeerindeki “Dereköy” qırımtatar medeniy-etnografik merkezinde “Medeniyeti ve tili yaşar eken, halq da yaşar” mevzusında olıp keçken munaqaşa aqşamında Qırım Yuqarı Şurası Milletlerara munasebetler ve sürgün olunğan grajdanlarnıñ işleri boyunca daimiy komissiyanıñ reisi, Meclis reisiniñ muavini Remzi İlyasov, Qırım Yuqarı Şurasınıñ deputatı, Meclisniñ tasil ve medeniyet idaresiniñ başı, “Maarifçi” birleşmesiniñ reisi Safure Kacametova ve Milliy Meclis azası, “Adalet” firqasınıñ başı Fevzi Kübedinov iştirak ettiler.

Merkezniñ direktorı Zarema Menseitova öz selâmlav çıqışında Yalta şeeriniñ sakinlerine ve Aqmescitten kelgen musafirlerge merkezniñ işine qoltutqanları içün teşekkür bildirdi.

Zarema hanım kelecekte Merkezde tilimizni, medeniyetimiz ve ananelerimizni ğayrıdan tiklev boyunca tedbirler aqqında ikâye etti. İşte, 2012 senesi dkabr 1-de balalar icadına bağışlanğan tedbir keçirilip, yılnıñ soñunda ise Yılbaş bayramı teşkil etilecek. Tabiiy ki, bütün tedbirler ana tilinde keçecek.

Remzi İlyasov Qırım Yuqarı Şurası Daimiy komissiyasınıñ bu yönelişte yapqan işleri ve cümleden, Qurultayda qabul etilgen “Ana tili oğrunda küreş” programmasını amelge keçirüv boyunca areketlernen tanış etti.

Safure Kacametova Milliy Meclisniñ medeniyet ve maarif idaresi em de “Maarifçi” birleşmesiniñ ana tili müitini yaratuvğa qoşqan isseleri aqqında ayttı. Onıñ bildirgenine köre. “Dereköy” merkezi ve “Maarifçi” birleşmesi arasında ana tilini tiklev ve qorçalav saasında işbirlik boyunca añlaşma tizgenler, ana tili kurslarını açqanlar. S. Kacametova “Dereköy” merkezine ana tilini zayıf bilgenler içün dersliklerni ediye etip, qırımtatar tilinde çıqqan neşirlerge ve “Seyran ocanıñ dersleri”ni basqan “Maarif işleri” gazetasına mıtlaqa abune olmağa çağırdı.

Milliy Meclis azası, “Adalet” firqasınıñ reisi Fevzi Kübedinov aytılğan sözlerniñ episi amelge keçecegine ümüt bildirdi.

Yalta şeeriniñ sakini, bir çoq mukâfatlar saibi, Qırımnıñ tışında pek meşur bestekâr, çalğıcı Nazim Ametov merkezde yaşlar içün icadiy aqşamlar keçirmekni işandırdı. Remzi İlyasov ve Safure Kacametova musafirlerniñ bir çoq suallerine cevap berdiler.