Mecliste “Bozulğan balalıq” körüşüv-oturışı olıp keçti

27 Sentâbr 2024

2024 senesi berim ayınıñ 26-nda Qırımtatar Milliy Meclisinde vaqtınca işğal etilgen Qırımda yaşağan qırım siyasiy mabüsleriniñ qorantaları ve balalarına yardım meselesini muzakere etmek maqsadınen “Bozulğan balalıq” körüşüv-oturışı olıp keçti.

Offline/online şeklinde keçirilgen körüşüvde Qırımtatar Milliy Meclisiniñ reberligi ve azaları, Türkiye ombudsmanı Şeref MALKOÇ, Ukraina Yuqarı Şurasınıñ Qırım Muhtar Cumhuriyeti ve Aqyar şeeri boyunca insan aqları meseleleri vekâletli temsilcisi Elvin KADIROV, Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Denıs ÇISTÂKOV, Türkiyeniñ Ukrainadaki Elçihanesiniñ temsilcileri, göñülliler, reberler ve hayriye teşkilâtlarınıñ temsilcileri iştirak ettiler*.

Körüşüv-oturışnıñ neticesinde iştirakçiler, ana-babaları, aqayları, oğulları qanunsız olaraq azatlıqtan marum etilgeni sebebinden ağır vaziyette qalğan siyasiy mabüslerniñ qorantalarına yardım etecek bir sıra tekliflerni işke tüşürdiler.

Qoşma malümat: 2014 senesi kiçik aydan berli vaqtınca işğal etilgen Qırım Muhtar Cumhuriyeti ve Aqyar şeerinde Rusiye Federatsiyası ve onıñ işğalci memuriyeti tarafından insan aqları ve esas azatlıqları, şu cümleden söz serbestligi, barışıq toplaşuv, fikir ve din serbestligi bozula, insanlıqqa qarşı cinayetler, cenk cinayetleri ve halqara gumanitar ve halqara cinaiy uquqnıñ başqa bozulmaları yapıla, siyasiy sebeplerden cinaiy taqipler, qanunsız apis cezaları, tintüvler keçirile, azaplar qullanıla, adaletli makeme aqqı bozula.

2024 senesi arman ayına qadar Qırımda Rusiye işğalcileri siyasiy sebeplerden 218 insannı qanunsız olaraq apiske aldılar, olardan 133-ü – qırımtatar halqınıñ vekilleridir.

Siyasiy mabüslerniñ qorantalarındaki çağına yetmegen balalar ana-babalarınıñ qanunsız taqip etilüvi sebebinden mahsus faciağa oğraylar. Ana-babası basqığa oğratılğan ve qanunsız olaraq azatlıqtan marum etilgen balalar, balalıqtan başlap, bir anda, aileniñ başqa azaları içün mesüliyetini añlap, büyük olalar. Bu vaziyette cemiyetniñ diqqatı ve destegi pek müimdir.

_____________

*Rusiye-Ukraina cenki şaraitinde telüke sebeplerinden oturışta iştirak etken bir sıra teşkilât ve şahıslar aqqında tafsilâtlı malümat berilmey