Meclisniñ Ukraina içün “razılaşma”nıñ qabul etilmemesi aqqında beyanatı

14 Noyabr 2024

Qırımtatar Milliy Meclisiniñ

öz toprağı ve suverenitetiniñ qısmını teslim etip

Ukraina içün “razılaşma”nıñ qabul etilmemesi aqqında

beyanatı

2014 senesi Rusiyeniñ Qırım işğali başlağan soñ qırımtatar halqı Rusiye Federatsiyasınıñ Qırımnı işğal etmege ıntıluvına qarşı çıqtı ve mustaqil Ukraina devletiniñ topraq bütünligi ve suverenitetine qol tuttı.

Rusiye Federatsiyası işğal etilgen Qırımda qırımtatarlarnı bütünley taqip etti, tamır halqınıñ yekâne vekâletli temsil organı olğan Qırımtatar Milliy Meclisini aşırıcı teşkilât olaraq ilân etti ve onıñ faaliyetini yasaq etti, qırımtatarlarnı Qırım tışına çıqarmaq siyasetini alıp bara ve halqara uquqnıñ esas printsipleri ve qaidelerini qaba şekilde boza.

Qırımtatar Milliy Meclisi tamır qırımtatar halqınıñ nazar noqtasını ifade etip, Rusiye-Ukraina cenkiniñ bitirilmesi meselesi boyunca resmiy muzakerelerniñ keçirilmesi içün Ukrainanıñ halqara seviyede tanınğan sıñırlarında topraq bütünliginiñ ğayrıdan tiklenmesi şart olmaq kerek, dep tüşüne.

Soñki vaqıtları peyda olğan ve Ukrainağa Qırım ve başqa ukrain topraqlarınıñ işğaline razı olmağa teklif etken farqlı beyanatlardan sebep, Qırımtatar Milliy Meclisi böyle beyanat bere:

– Qırımtatar Milliy Meclisi Ukrainağa qarşı Rusiye tecavuzınıñ tez vaqıtta yekünlenmesine, Ukrainanıñ halqara seviyede tanınğan sıñırlarında, şu cümleden Qırım Muhtar Cumhuriyeti ve Aqyar şeerinde, Ukrainanıñ topraq bütünliginiñ ğayrıdan tiklenilüvi esasında adaletli barışıqqa irişüvine, Rusiye tecavuzcısınıñ Ukraina devletine ve vatandaşlarına ketirgen zararınıñ ödenilmesine, Ukrainağa qarşı tecavuz cinayetlerini yapqan şahıslarnıñ cezalandırılmasına, mustaqil Ukraina devletiniñ telükesiz inkişafına halqara kefaletlerniñ berilmesine samimiy israr ete;

– Qırımtatar Milliy Meclisi Ukraina Prezidenti, Ukraina Yuqarı Şurası, Ukraina havfsızlıq ve mudafaa quvetleriniñ Ukraina devletiniñ suverenitetini ve topraq bütünligini qorçalamaq, Ukraina vatandaşlarınıñ ayatını saqlap qalmaq, havfsızlığını temin etmek, aq-uquqları ve serbestliklerine riayet etüvge doğrultılğan mevamını ve areketlerini destekley;

–Qırımtatar Milliy Meclisi Amerika halqınıñ saylavını ürmet etip, Donald Trumpnıñ AQŞnıñ 47-inci Prezidenti olaraq saylanmasını alğışlay, saylanğan Prezidentniñ, em de Amerika Qoşma Ştatları Kongressiniñ ve Ükümetiniñ Amerika Qoşma Ştatlarınıñ Ukraina topraq bütünligine nisbeten printsipial ve ardı-sıra tutqan nazar noqtasını devam etecegine işanç bildireler, bu, 2018 senesi oraq ayınıñ 26-nda qabul etilgen Qırım beyannamesinde eñ açıq şekilde ifadelendi: “Birleşken Devletler, halqara uquqqa zıt şekilde küçnen zapt etilgen topraqlar üzerinde suverenitetni tesis etmek içün Kremlniñ talaplarını tanımamaq siyasetini tekrar tasdıqlay. Birleşken Devletler ittifaqdaşları, ortaqları ve halqara toplulıqnen beraberlikte Rusiyeniñ Qırımnı işğal etüv ıntıluvını red ete ve Ukraina topraq bütünligi ğayrıdan tiklengenine qadar bu siyasetini devam ettirecek”, – dep bildirildi.

– Qırımtatar Milliy Meclisi emin ki, Rusiye Federatsiyasınıñ Qırımğa ve Ukrainanıñ başqa işğal etilgen topraqlarına er angi türlü topraq istilâsı tek beklenilgen barışıqqa ketirmez, aynı zamanda yañı arbiy ve siyasiy çatışmalarnıñ sebebi olur;

– Qırım tamır qırımtatar halqınıñ vatanı ve Ukraina devletiniñ ayırılmaz parçasıdır. Buña köre, Qırım yarımadasınıñ topraq mensüpligi, onıñ uquqiy statusı, siyasiy, iqtisadiy, içtimaiy, medeniy yaşayışınıñ teşkil etilmesi boyunca iç bir qarar tamır qırımtatar halqınıñ iradesi ve Ukraina devletiniñ razılığı olmadan qabul etilmemek kerek.

Ukrainağa şan-şerefler!

Qırımtatar Milliy Meclisiniñ

Başı Refat Çubarov

2024 senesi boş aynıñ 13-ü

Kıyiv ş.