Meclisniñ nevbetteki toplaşuvı

31 March 2013

Kün tertipniñ esas meseleleri: qırımtatar halqı soyqırımı qurbanlarınıñ hatırasına bağışlanğan ve sürgünlikniñ 69 yıllığı munasebetinen keçirilecek matem tedbirleri; Qurultay delegatlarını saylavnıñ ketişatı aqqında.

Qırımtatar halqı soyqırımı qurbanlarınıñ hatırasına bağışlanğan ve sürgünlikniñ 69 yıllığı munasebetinen keçirilecek matem tedbirleri boyunca meselelerni muzakere etüv devamında Meclis matem tedbirlerini azırlav boyunca komitetke Meclis Prezidiumınıñ nevbetteki toplaşuvında tasdiqlamaq içün tedbirler planını siyasiy-içtimaiy vaziyetni köz ögüne alaraq işlemekni avale etti.

Toplaşuvda Hıdırlez bayramını keçirüv meselesi de baqılıp, Prezidium azası Emine Avamilevanıñ reberliginde teşkiliy komitet tizmek qararı alındı. Teşkiliy komitetke regional meclislerniñ reisleri de kirsetildi. Hıdırlez bayramı mayıs 6-da soñki yıllarda qayd etilgen yerinde yani Bağçasaray rayonında Şeherizada restoranı yanında keçirilecek.

Soñra söz sırası Qurultay delegatlarını saylav boyunca Merkeziy saylav komissiyasınıñ reisi Zair Smedlâyevge berildi. O, toplaşuv iştirakçilerine Qurultayğa delegatlarnı saylavlarnı keçirüvge azırlıqnıñ ketişatını tarif etti. Zair Smedlâyevniñ aytqanına köre, bugünde-bugün Qurultayğa delegat saylavlarda 14 qırımtatar cemaat ve siyasiy teşkilât iştirak etmek istegini bildirip, olardan 13-i komissiya tarafından cedvelge alındı.

Merkeziy saylav komissiya reisi qayd etti ki, proportsional sistema boyunca teşkilât ve bloklarda 201 adam cedvelge alınıp, Qurultayda 50 yerge iddia eteler. Zair Smedlâyev toplaşuv iştirakçileriniñ diqqatını şuña celp etti ki, delegatlıqqa namzetlerini majoritar dairelerden köstergen teşkilâtlar ve olarnıñ saylav blokları namzetler boyunca öz tekliflerini bildirmege aqları bar. İmzalanğan añlaşmağa köre Qurultay delegatlarını saylav ceryanını halqara közeticiler nezaret etecekler, dedi komissiya reisi.

Zair Smedlâyevniñ aytqanına köre kelecek afta qırımtatar cemaat ve siyasiy teşkilâtlar, olarnıñ blokları saylav bülletenlerine nasıl yerleştirilmesini belgilemek içün pyanke çekmek planlaştırıla.

Meclis toplaşuvınla bunıñ kibi de Büyük Cuma Cami, Bor-Çoqraq qasabasında milliy mektep qurucılığına dair mesele de baqıldı.

Toplaşuvnıñ soñunda Meclis regional meclislerniñ reislerine regiondaki esas problemlerni qalemge almaqnı avale etti ki, soñra bu problemler akimiyet ile körüşüvlerde baqılacaq.