Meclisniñ Başınıñ Qurban bayramınen hayırlavı

16 Iyün 2024

Ürmetli Ukrayina musulmanları!

Sayğılı vetandaşlar!

Öz qullarına rahmeti soñsuz olğan Allah-u Teala bizge daa bir kere Qurban Bayramğa qavuşmağa ve qutlamağa qısmet etti.

Rabbimiz tarafından bizge bahşetilgen Qurban Bayramı, musulmanlar arasındaki bağlarnı küçlendire ve dürüstlik, samimiyet, sabır, merametlik, adalet, mertlik, alicenaplıq ve temizlik kibi İslâm dinniñ güzel ahlâqiy çizgilerni pekiştire.

2014 senesiniñ Kiçik ayında Qırımnıñ işğali ile başlağan cenk, vetandaşlarımıznıñ yaşayışını butünley deñiştirdi. Ukrayina musulmanları, diger din mensüpleri kibi, qarşılarına çıqqan imtianlardan şeref ile keçmekteler ve Ukrayin devletini qorçamaq ile bağlı vazifelerini yerine ketirmekteler.

Şu bayram künlerinde Ukrayina Mudafaa Quvetlerine hızmet etken ve Ukrayna devletini qorçalağan butün musulman askerlerge şükranlarımıznı bildiremiz. Bunıñnen beraber Qırımğa ve Ukrayina devletine sadıq qalğan siyasiy mahpuslarımızğa, olarnıñ qorantalarına ve butün qırımtatar halqına da müteşekkirmiz.

Qırımtatar halqınıñ vetanı olğan Qırımnıñ tezden işğalden azat etilmesi, em anda, em diger işğal etilgen topraqlarda Ukrayin akimiyetiniñ tiklenmesi içün Allahqa dualar etemiz.

Qırımtatar Milliy Meclisi adından ve şahsımdan Qurban Bayramıñıznı hayırlayım!

Refat Çubarov

Qırımtatar Milliy Meclisiniñ Reisi

Bozarğan aynıñ 16. künü 2024

Kyiv ş.