Meclisniñ başınıñ birinci muavini ve siyasiy mabüs Nariman Celâl 44 yaşına kirdi

27 Aprel 2024

İstidatlı jurnalist, işançlı arqadaş, cesür devlet hızmetçisi, öz halqına sadıq mucadeleci.

Öz ailesiniñ, dört balası ve apayı Levizanıñ destegi.

Qırımtatar Milliy Meclisiniñ başınıñ birinci muavini.

Sadıq ve ürmetli vatandaşı olğan bütün Ukrainanıñ belgeni insan.

Qırımtatar halqınıñ ğurur etkeni insan.

***********************

Keçken sene bu kün Nariman CELÂL 43 yaşına kirgende men bu sözlerni yazdım.

Amma o zaman 2021 senesi berim ayında qapatılğan Nariman Qırımdaki SİZOda bulunğan edi. Bunıñ içün onıñ apayı Leviza ve advokatları çoq maniağa baqmadan onen körüşe bile ediler.

Birazdan 2023 senesi orta küz – boş ayları devrinde Nariman CELÂL tecavuzcı bir devletke etap etildi ve Krasnoyarskiy kraynıñ Minisinsk şeerindeki sert rejimli müstemlekede qapatıldı.

Neticesinde XX a. biñlerce qırımtatar repressiya etigen kibi XXI a. Nariman CELÂL ve onlarca başqa siyasiy mabüs – qırımtatar adamı yañıdan sürgün etildi.

2014 senesi kiçik ayda Moskvanıñ başlatqanı rus-ukrain cenki, Qırımnıñ ve Ukrainanıñ başqa topraqlarınıñ işğali, tamir qırımtatar halqınıñ añlı taqipleri ve repressiyaları, biñlerce ukrain sakininiñ öldürüvi rusiyeniñ asırlar boyunca deñişmegen ve başqa topraqlarnı zapt etmege, halqlarını yoq etmege yönelgen varvar ve pis ruhunı köstereler.

Qırımtatar halqı ve tuvğan Qırımnı qorçalağanda Ukrainanıñ sadıq vatandaşı olaraq Nariman CELÂL qırımtatar halqınıñ aqları ve azatları içün mucadele etken cesür insanlarnıñ evelki nesilinen bugünki siyasiy mabüslerniñ yaqın bağı ve devamını köstere.

Nariman CELÂLnıñ doğğan künü oña ve ailesine – apayı Leviza, balaları Adile, Emine, Cemil, Niala, anası Ayşe ablağa destek ve ürmet bildirem.

Bu fırsatnı qullanaraq, rus işğalcileriniñ tutqanları tüm qırım siyasiy mabüsleri ve ailelerine de açıq göñülden destek bildirem.

Unutmayıq ki, Qırım rus işğalcilerinden azat etilecek, bizim balalarımız, qardaşlarımıznı taqip etken pis adamlar ceza alacaqlar!

Hayırlı yaşlar olsun Narıman dostum!

Refat Çubarov

Qırımtatar Milliy Meclisiniñ başı

Kıyiv ş.

2024 senesi çiçek ayınıñ 27. künü