Meclisniñ AQŞtaki temsilcisi Ayla Baqqallı Kommunizm qurbanlarınıñ anitine gülçember qoyuv merasiminde iştirak etti

17 Iyün 2013

2013 senesi iyün 12 künü “Kommunizm qurbanları anitiniñ vaqufı” reisi Li Edvardsnıñ daveti ile Bütündünya qırımtatarlar kongressi Koordinatsion keñeşiniñ azası, Meclisniñ AQŞtaki temsilcisi Ayla Baqqallı Vaşington şeerinde Kommunizm qurbanlarına anitke gülçember qoyuv merasiminde iştirak etti.

Tedbir ükümetten tış olğan “Kommunizm qurbanları aniti vaqufı” tarafından er yılı ötkerile. Anit qoyulğanınıñ 6 yıllığına bağışlanğan tedbirde AQŞ Kongressiniñ azaları, Litvaniya, Latviya, Estoniya, Daniya, Şvetsiya ve Finlândiya parlamentleriniñ vekilleri, Ukrainanıñ Amerikadaki Elçiliginiñ vekilleri, yigirmiden ziyade devlet elçilikleriniñ azaları, cemaat teşkilâtları ve milliy cemiyetleriniñ vekilleri iştirak ettiler.

“Men Ukraina elçiliginiñ azalarına qoşulıp, Ukrainanıñ Amerikadaki Elçiliginiñ mesleatçısı Yaroslav Brisük ile yan-yanaşa Kommunizm qurbanlarınıñ anitine gülçember qoymaq içün areket ettim”, – dedi A. Baqqallı. Onıñ aytqanına köre o, “Kommunizm qurbanları anitiniñ vaqufı” reisi Li Edvards ile körüşip, Milliy Meclis yolbaşçıları adından teşekkür bildirdi. Ayla Baqqallı Vaquf reisine Meclisniñ Halqara forum keçirilmesi oğrunda yapqan areketleri aqqında malümat berdi.

“Subetimiz devamında biz cellât Stalinge eykel qoyuv, qanlı işlerini köstergen sergilerni teşkil etüv demokratiya printsiplerini ayaq astına almaq olğanını qayd ettik, – dedi Bütündünya qırımtatarlar kongressi Koordinatsion keñeşiniñ azası, Meclisniñ AQŞtaki temsilcisi. – Men oña Aqmescitte qırımtatarlar Stalin sergisine qarşı çıqqanlarını ayttım. Bu bizim demokratik degerliklerge sadıqlığımıznı köstere”.

Bütündünya qırımtatarlar kongressi Koordinatsion keñeşiniñ azası, Meclisniñ AQŞtaki temsilcisi Ayla Baqqallı “Kommunizm qurbanları anitiniñ vaqufı”nen işbirlikni devam etmek maqsadını bildirdi.

“Amerikadaki ukrain diasporasınen körüşüvlerimni devam etip, AQŞta qırımtatar meselesini kütleviyleştirmek isteyim”, – deji Baqqallı hanım.
Bundan da ğayrı A. Baqqallı bildirgenine köre bugünde-bugün o, “Qırımda ve türk dünyasında demokratiyanıñ inkişafı” mevzusında programma boyunca öz işiniñ taqdimine azırlıq alıp bara.