Meclis yolbaşçısı Malayziyanıñ Ukrainadaki elçisinen körüşti

11 Mart 2011

İyül 6 – da Kiyevde Meclis reisi Mustafa Cemilev ve Malayziyanıñ Ukrainadaki Vefqulade ve Vekâletli Elçisi Çua Teong Ban beraber üylelik yemegini aşağan vaqıtta iş meseleleri hususında fikir paylaştılar.

Elçi keçenlerde Qırımda iş ziyaretinen bulunğanda Meclis reisiniñ Qırımda olmağanı sebebinden körüşalmağanını keder ile qayd etip, Qırım musulmanlarınıñ müftisi acı Emirali Ablayevnen körüşkeni aqqında ayttı. Malayziya elçisi Meclis reisine Ridvan Veliyevniñ kim olğanını añlatmasını rica etti. Endi çoqtan berli Elçinen Kiyevde körüşmege tırışqan bu insan kendini Qırım musulmanlarınıñ baş müftisi olaraq taqdim etmekte. Meclis reisi Ukrainada musulman cemiyetleri ve teşkilâtlarındaki vaziyet boyunca tafsilâtlı ve açıq malümat berdi.

Bunıñ kibi de körüşüvde İslâm Konferentsiyası Teşkilâtınıñ işinde Ukrainanıñ da nezaretçi olaraq iştiraki meselesi muzakere olundı. Elçi emin ki, Ukraina Tışqı İşler Nazirliginiñ böyle ricanen Malayziyağa muracaat etmesi Ukrainanıñ menfaatında. Elçi ise İKT azası olaraq qoltutmağa söz berdi.

Subetdeşler bunıñ kibi Malayziyada er sene İslâm qaideleri esasında çıqarılğan “Halâl” mahsulatlarınıñ sergisinde qırımtatar iş adamlarınıñ iştirak etüv meselesini köterdiler