Meclis yolbaşçılarınıñ diplomatik missiya ve Ukrainada akkreditatsiya etilgen halqara teşkilât yolbaşçıları ile üçünci er yıllıq körüşüvi olıp keçti

21 Noyabr 2013

Noyabr 21 künü Kiyevde Milliy Meclis yolbaşçılarınıñ Ukrainada akkreditatsiya etilgen diplomatik missiyalar ve halqara teşkilât vekillerinen olıp keçken er yıllıq 3-nci körüşüvi olıp keçti.

Körüşüvde çet devlet elçilikleri, BMT, Avropa Birligi kibi halqara teşkilâtlar, Migratsiya boyunca halqara teşkilâtnıñ Ukrainadaki temsilciligi, BMT aliy komissarı idaresiniñ Beyazrusiye, Moldova ve Ukraina boyunca temsilciliginiñ 30-dan ziyade vekilleri, Milliy Meclisniñ bütün azaları ve Meclisniñ yañı saylanğan reisi Refat Çubarov iştirak ettiler.

Körüşüvniñ resmiy teşkilâtçısı “Qırım inkişafı fondı” hayriye teşkilâtı, ortağı ise “Qırım Halqara Biznes Birleşmesi” oldılar.

Bundan da ğayrı, er yıllıq körüşüv iştirakçileri arasında Ukraina nazirlikleri ve merkeziy akimiyet idarelerniñ, Qırım akimiyeti organlarınıñ vekilleri iştirak ettiler.

Bu sene körüşüvniñ baş mevzusı Ukrainanıñ Avropağa qatıluv niyetlerini kerçekleştirüv çerçivesinde qırımtatar problemini çezüv yollarınıñ muzakeresi oldı.

Tögerek massa iştirakçileri qırımtatar halqınıñ qaytarılması, yerleştirilmesi ve aqlarınıñ ğayrıdan tiklenilmesinen bağlı meselelerni, bunıñ kibi de 2014 senesiniñ birinci yarımyıllığında qırımtatar halqı aqlarınıñ ğayrıdan tiklenmesi boyunca halqara forumnı keçirüv istiqballeri baqıldı.

Körüşüv devamında Meclis yolbaşçıları çetel diplomatik missiyalar ve halqara teşkilâtlardan Ukrainada qırımtatar probleminiñ çezilmesi boyunca işbirlik meselesinde nelerni beklegenleri de muzakere etildi.

“Biz halqara cemiyet vekillerine maqsadı Ukrainada qırımtatarlarnıñ müim meselesini çezmek olğan umumavropa ve transatlantik dialognı keçirüvge qoltutqanları içün teşekkürlerimizni bildiremiz.

Ukraina Avropa Birliginen Birleşme aqqında añlaşma imzalav kibi müim vaqia arfesinde turğanda qırımtatarlarnıñ meselesini çezmek oğrunda küçlerni birleştirmek pek müimdir. Ümüt etemiz ki, ukrain akimiyeti vekilleri de bu dialogğa qoşulır ve qırımtatar halqınıñ qaytması, yerleşmesi, bunıñ kibi de tarihiy vatanlarında aqlarınıñ tiklenmesinen bağlı siyasiy-uquqiy meselelerniñ çezimine yardım eterler”, – dedi Qırımtatar halqı Meclisiniñ reisi Refat Çubarov.

Körüşüv devamında “Larişes” Qırım tarihı müzeyi tarafından azırlanğan taqdimname olıp, onıñ sayesinde iştirakçiler qırımtatarlarnıñ diplomatik ve halqara alâqalarınıñ tarihınen tanış oldılar.