Meclis yolbaşçıları Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüştiler

18.09.2012

2012 senesi sentâbr 18 künü Kiyevdeki “Hyatt” ötelinde Qırımtatar halqı Meclisiniñ yolbaşçıları Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüştiler.

Meclis reisi Mustafa Cemilevniñ bildirgenine köre, er yılı keçirilgen körüşüvniñ baş maqsadı qırımtatar halqı ve milliy mensüpligine köre sürgün etilgen diger milletlerniñ aqlarını tiklev meselesinde Ukrainağa yardım etüv boyunca halqara cemaatçılıqnıñ diqqatını celp etmektir.

“Körüşüvde muzakere etilgen esas mesele Qırımtatar halqınıñ öz vatanında aqlarını ğayrıdan tiklev, Ukrainada onıñ telükesizligi ve inkişafını teminlev boyunca halqara forum keçirilmesiniñ ğayesi oldı”, – dedi M. Cemilev ve Meclisniñ elçilikler ve halqara teşkilât yolbaşçılarınen birinci körüşüv keçken seneniñ oktâbr 5-nde olıp keçkenini hatırlattı.

Qırımtatar halqı Meclisi yolbaşçılarınıñ Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüşüvinde Meclis reisi, Ukraina halq deputatı Mustafa Cemilev, Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov, Qırım Nazirler Şurasınıñ reisi Anatoliy Mogilöv, “Qırım inkişafı vaqufı” hayriye teşkilâtınıñ prezidenti Rustem Ümerov, OSCE Aliy Komissarınıñ mesleatçısı Aleksandr Vinnikov, Halqara Forumğa azırlıq çerçivesinde Qırımdaki vaziyet aqqında esabat azırlav boyunca mustaqil ekspertler gruppasınıñ halqara koordinatorı Endrü Vilson çıqışta bulundılar.

18 sentâbr körüşüvine bunıñ kibi de Ukraina Prezidenti Memuriyetiniñ vekilleri, Prezitentniñ Qırımdaki daimiy temsilcisi Viktor Plakida, Ukraina tışqı işler nazirligi hadimleri ve Ukraina içtimaiy siyaset naziri davet etildiler.

Körüşüv “Qırım inkişafı vaqufı” hayriye teşkilâtınıñ qoltutuvında keçirildi.