Meclis yolbaşçıları Qırım cemaatınıñ fikirinen tanıştılar

26 Oktâbr 2011

2011 senesi oktâbr 26  künü Qırımtatar halqı Meclisiniñ ofisinde AQŞ Halqara Cumhuriyet institutınıñ sımarışı boyunca Qırımda 2011 senesi cemaat fikirini  tedqiq etüv devamında elde etilgen neticeler taqdim olundı.

Taqdimnameni “Baltic Surveys”  (The Gallup Organization) cemaat fikirini tedqiq etüf  merkeziniñ direktorı Rasa Alişauskene   (Rasa Alisauskiene) Meclis reisi Mustafa Cemilev ve AQŞ Halqara Cumhuriyet institutınıñ Ukrainadaki Vekâletliginiñ direktorı Kris  Holzen (Chris Holzen)niñ bivasta iştirakinde ötkerdi. Tedbirde bunıñ kibi de  “Halqara Cumhuriyet institutı” programmasınıñ Qırımdaki vekilleri Konstantin Ploskiy  ve Anna Bondarenko iştirak ettiler. Meclisni ise tışqı alâqalar bölüginiñ başı Ali Hamzin, Meclis Kâtibiyetiniñ reberi Zair Smedlâyev, Meclis Topraq komissiyasınıñ başı Zevcet Qurtümerov, 5-nci çağırılış Qurultayı  Teftiş komissiyası reisiniñ vazifesini eda etici  Qurtseit Abdullayev temsil ettiler.

 Kris Holzen haber etkenine köre   Halqara Cumhuriyet institutınıñ qoltutuvında Ukrainada  1994 senesinden berli  cemaatçılıqnıñ fikiri ögrenile.

  “Tedqiqatlarımıznıñ maqsadı – cemaatçılıqnıñ fikirini ögrenmek ve elde etilgen neticelernen cemi menfaatdar taraflarnı tanış etmektir”, – qayd etti Holzen.  Onıñ aytqanına köre  Qırım regionı Ukrainanıñ diger regionlarından farq ete.

  Öz nevbetinde  cemaat fikirini ögrenüv merkeziniñ direktorı “Baltic Surveys”  (The Gallup Organization) Rasa  Alişauskene  şunı da qayd etti, institut sımarışı boyunca birinci tedqiqat  2009 senesi noyabr ayında başlanıp,  Qırımnıñ, şu cümleden Aqyarnıñ, 18 yaşlı 1200 sakini soravdan keçirilip, nevbetteki soravnı 2011 senesi teşkil etmek qararı alınğan edi. “20 sentâbrden oktâbr 2-ge qadar  Qırım ve şu cümleden Aqyarnıñ 18 ve bundan büyük yaştaki 1200 sakini öz evinde sorafdan keçirildi”, – bildirdi  Alişauskene. Halqara İnstitut vekilleriniñ qayd etkenine köre, tedqiqatlarnıñ 2,8 fayızı yañlış  ola bilir.  Qırımda  soravnı  “Reyting” sotsialogik gruppası  alıp bardı.

 “Qırım ealisiniñ siyasiy faalligi, mass-mediağa munasebet, Ukrainanıñ Avropa Birligine kirmesi. Rusiye ve AQŞ arasındaki emekdaşlıq, cemiyette kerginlik  derecesi –  tedqiqat devamında işte, bu kibi sualler köterildi”, dedi  Rasa  Alişauskene, tedqiqat yönelişini talil eter eken.

  “Qırım ve Ukraina siyasiy ceryannıñ faal vekilleriniñ büyük bir qısmı  mezkür tedqiqat neticelerinen endi tanıştır”, – dediler Halqara institut vekilleri. Qırımda cemaat fikiri tedqiqatlarınıñ neticeleri Halqara Cumhuriyet İnstitutınıñ resmiy saifesinde derc olunacaq   (http://www.iri.org/).