Menu 
Meclis yolbaşçıları: «Er angi faaliyette dialog ve özara añlav zarur»
12 Mayıs 2012
2012 senesi mayıs 11 künü Qırımtatar akademik milliy teatrde Qırımtatar halqı Meclisiniñ yolbaşçıları qırımtatar cemaat ve siyasiy teşkilâtlarnen körüştiler. Körüşüv mevzusı – İçtimaiy- siyasiy vaziyet ve Qırımtatar halqı Meclisi faaliyetiniñ esas yönelişleri”. Qırımtatar cemaat ve siyasiy teşkilâtları vekilleriniñ suallerine Mustafa Cemilev ve onıñ birinci muavini Refat Çubarov cevap berdiler.
Teessüf ki, öz işini areket çerçivesinde faalleştirip, onı halq cebesi diye ilân etken bir sıra qırımtatar teşkilâtları Meclisnen körüşmek kerekligini söylegenlerine baqmadan, kendileri bu körüşüvge kelmediler. “Bu körüşüvge çoqtan azırlanılıp, kütleviy matbuat vastalarında da haber etildi, – dep başladı körüşüvni Refat Çubarov. – Biz körüşüvimizni sual-cevap şekilinde keçireyik, bunıñ kibi de siz oz teklifleriñizni de bildirirsiñiz”.
Körüşüvniñ başında Refat Çubarov mayıs 18-de keçirilecek tedbirlerde toqtalıp, mayıs 13 künü qırımtatar gençler teşkilâtlarınıñ azaları Çatırdağğa seferge çıqacaqlarını ayttı. Mayıs 17-de Ukrain teatrinde hatıra aqşamı, soñra meydanda “Qalbiñde ateş yaq” aktsiyası, mayıs 18-de ise ATR kanalı Bütünqırım matem mitingini canlı kösterecek.
Öz nevbetinde Meclis reisi Mustafa Cemilev halqımıznıñ Vatandan sürgün etilgen künü mayıs 18-ge bağışlanğan tedbirler keçken senelerdekisinden farq etecegini bildirdi. “Adeti üzre dua oqulacaq, qırımtatarlarnıñ müim meseleleri muzakere etilecek. Amerika, Rusiye, Türkiye, Romaniya, Özbekistan ve diger devletlerden 25-ten ziyade nufuzlı musafir kelecek. Bunıñ kibi de SSSR kommunist rejimine qarşı küreşken ve bunıñ içün bir qaç kere mahkeme etilgen 20-den ziyade siyasiy mahbüsler de davet etildiler. Bular arasında belli sovet uquqqoruyıcısı Lüdmila Alekseyeva, yazıcı, SSSRde dissident areketiniñ esasçılarından biri Vladimir Bukovskiy, belli uquqqoruyıcı, akademik Andrey Saharovnıñ qızı Tatyana Yankeleviç, dissident areketiniñ faali, Helsinki Moskeva gruppasınıñ azası Pötr Grigorenkonıñ oğlu Andrey Grigorenko de bar, dedi Mustafa Cemilev. Meclis reisi şunı da qayd etti ki, böyle körüşüvlerni Meclisniñ daimiy programm tedbiri olaraq keçirip, semetdeşlerimizni olarnı qasevetlendirgen bütün meseleler boyunca fikir paylaşmaq faydalı olur.
“Namus” teşkilâtı bir qaç kere Mecliske “Qırımtatar halq cebesi” vekillerinen müim meselelerni muzakere etmek ve bir fikirge kelmek içün körüşmekni teklif etti. Bugünki vaziyette halqnıñ vekâletli organı kim olmasından qatiy nazar iç bir türlü aracılıqnı qabul etmez. Halq cebesi vekilleri ise Meclisniñ qabul künleri kelip, öz fikirlerini bildire bilirler. Biz olarnen körüşmege azırmız, amma olar Mecliske kelmek kerekler. Söyleşüvler içün Meclisniñ qapıları daima açıq, veyekâletli organ iç kimseni üstün körmey, halq adından ve bütün halq ile dialog alıp bara”, – dedi Mustafa Cemilev.
Refat Çubarov bu mesele muzakeresini devam eterek, Meclis azaları öz resmiy saifesinde muhalif küçlerge sayğı kösterip, iç kimseni aqaret etmegenlerini ayttı. Amma bir sıra cemaat teşkilâtları özleriniñ körüşüvlerinde Meclis ve azalarınıñ adına aqaretli sözler söylenilmesi adetke çevrildi, dedi. Meclis reberleriniñ kiriş sözlerinden soñ içtimaiy ve siyasiy teşkilâtlarnıñ vekilleri olarğa çoqtan-çoq sual berdiler..
Berilgen suallerden eñ kergini bu topraq probleması oldı. Meclis reisitniñ muavini Remzi İlyasov ve “Avdet” cemaat teşkilâtınıñ başgı Mustafa Mauşevni Qırım Nazirler Şurası yanında topraq komissiyası erkânına kirsetmek teklif etildi. Bundan ğayrı, bugünde-bugün halqnıñ ögünde daa bir büyük problema peyda oldı – damartılarnı resmiyleştirüv ve evlerni qullanuvğa teslim etüv.
Bu sualni Qırımtatar yaşlar merkeziniñ vekili berdi. Meclis reberleri buña keçken soñki toplaşuvalarnıñ birinde mezkür mesele baqılğanı ve ait komissiya qurulğanını bildirdi. Böyleliknen körüşüv devamında Meclis reberleri yerli meclislerge saylavlar, Halqara forum, narazılıq tarlalarnıñ faali Daniyal Ametovnıñ taqdirine ait suallerge cevap berip, halqnıñ teklif-mulâazalarını diñlediler.
2,5 saat devam etken körüşüvniñ soñunda .böyle subetlerni üç ayda bir kere keçirmek qararı alındı.
