Meclis yolbaşçıları Birleşken Milletler Teşkilâtı Milliy azlıqlarnıñ işleri boyunca Aliy Komissarı ofisiniñ hadimlerinen körüştiler

01 Avgust 2011

2011 senesi avgust 1 künü Meclisniñ ofisinde Qırımtatar halqı meclisiniñ reisi Mustafa Cemilev ÖBSE Milliy azlıqlarnıñ işleri boyunca Aliy Komisssarınıñ üyken mesleatçısı Aleksandr Vinnikov ve adliye meseleleri boyunca mesleatçısı Vinsent de Graf ile körüşti.

Körüşüvde bunıñ kibi de Bütündünya qırımtatarlar kongressiniñ prezidenti Refat Çubarov, Meclis tışqı alâqalar boyunca bölüginiñ başı Ali Hamzin ve Meclis Kâtibiyetiniñ reberi Zair Smedlâyev de iştirak ettiler.

Qırımtatar halqınıñ öz Vatanında aq-uquqlarını ğayrıdan tiklev, Ukrainada onıñ telükesizligi ve inkişafını teminlev boyunca Halqara forumnı azırlavnen bağlı meseleler subetniñ baş mevzusı oldı.

Belli ki Halqara forumnı keçirüv ğayesi ilk defa Qırımtatar halqınıñ 2010 senesi mayıs 18 künü Aqmescitte keçirilgen matem mitinginiñ qararında qayd olunıp, soñundan 2010 senesi avgust 29-da Qırımtatar halqı U çağırılış qurultayınıñ 3-nci sessiyasında bu hsusuta ait qarar alındı.

“Meclis reberleriniñ deyerlik bütün halqara ziyaretleri, Almaniya, Kanada, Poloniya, AQŞ, Türkiyeniñ yetekçi siyasetçilerinen, Ukrainada akkreditatsiya yapılğan bir çoq diplomatik vekâletliklerniñ reberlerinen körüşüvler Halqara forum keçirüv ğayesi maqullengenini kösterdi..Biz mezkür teşebbüsni muzakere etüvni devam eterek, bizim ğayemizge ukrain ükümeti de qoltutacağını bekleymiz”, – dedi Meclis reisi Mustafa Cemilev.

Meclis reisiniñ birinci muavini Refat Çubarovnıñ aytqanına köre, ukrain akimiyetiniñ Halqara forum boyunca beklev pozitsiyası teşkilâtiy ceryannı biraz sıñırlay, yani forumnı keçirüv vaqtı, yeri ve kün tertibi daa belli degil. “Bu munasebetnen biz halqara teşkilâtlardan, birinci nevbette Birleşken Milletler Teşkilâtı Milliy azlıqlarnıñ işleri boyunca Aliy Komissarına yardım sorap muracaattta bulunamız. Çünki siziñ mandatlarıñız qırımtatarlar probleminiñ çezimine yanaşmaq ve Ukraina ve qırımtatar halqınen beraber öz Vatanına qaytayatqan qırımtatarlarnıñ “yol haritası”nı tizmek imkânını bere”, dedi Bütündünya qırımtatarlar kongressiniñ prezidenti Refat Çubarov.

ÖBSE Milliy azlıqlarnıñ işleri boyunca Aliy Komisssarınıñ üyken mesleatçısı Aleksandr Vinnikovnıñ aytqanına köre Aliy komissarnıñ idaresi Qırımdaki vaziyetni daima nezareti altında tuta. “Körüşüvimizniñ neticelerenine biz ÖBSE Aliy komissarı Knut Vollebekni mıtlaqa haberdar etermiz. Biz Halqara forumnı keçirüv faydasına ketirgen delilleriñiz, hususan qırımtatar problemini Ukrainanen beraber çezmek hususındaki fikirleriñiz bizni meraqlandırdı”, – dediler ÖBSE Aliy komissar idaresiniñ vekilleri.

Körüşüv vaqtında bakılğan diger mevzular arasında ÖBSE Aliy komissar idaresiniñ vekilleri. Qırımda olıp keçken soñki adiseler, şu cümleden Kefede haç tiklevnen bağlı areketler hususında da aytıldı. Çıqışta bulunğan Ali Hamzin ve Zair Smedlâyev bu adiselerge ketirgen sebeplerni tafsilâtlı talil ettiler. Meclis vekilleriniñ fikrince kazak teşkilâtları yapqan qanunğa zıt bu aktsâilar Ukrainanıñ itibarını tüşürüv ve Qırımda vaziyetni kerginleştirmek maqsadını közde tutalar.

Körüşüv devamında bunıñ kibi de topraq meselelerini çezüv ve sürgünlikten qaytqanlarnı yer ile teminlev problemleri de muzakere etildi.