Meclis vekili Avropa parlamentiniñ deputatlarına Milliy Meclis reisi M. Cemilevniñ Halqara forum meselesi boyunca mektübini berdi

11 July 2013

Temsil etilmegen halq ve milletler birligi Prezidiumınıñ iyül 6-7 künleri ötkerilgen nevbetteki 15-nci toplaşuvında iştirak etken Milliy Meclis temsilcisi Abduraman Egiz Brüsselde bulunırken Avropa Parlamenti ve Avropa tışqı alâqalar hızmetinde Avropa parlamenti deputatlarınen bir sıra körüşüvler keçirdi.

Abduraman Egiz Avropa parlamentiniñ sabıq prezidenti, Avropa parlamenti deputatı ve Poloniyanıñ sabıq başt naziri cenap Yeji Büzek ile körüşip, onı Qırımtatar halqı Meclisiniñ reisi, Ukraina halq deputatı Mustafa Cemilevniñ Halqara forumnı teşkil etüv ve keçirüv meselesi boyunca Avropa parlamenti deputatlarınıñ adına yazğan mektübiniñ mündericesinen tanış etti.

Yeji Büzek öz küreşinde demokratik printsiplerge tayanıp iş tutqan qırımtatar halqınıñ areketine yüksek qıymet keserek, cian cemaatçılığı SSSRdeki kommunist rejiminen küreşken qırımtatarlarğa daima göñüldeşlik bildirgenini qayd etip, Halqara forum teşebbüsine qoltutqanını ayttı. “Ümüt etem ki, Umumavropa ailesiniñ bir qısmı olğan Ukraina da doğru qarar alıp, bu müim tedbirniñ Ukrainada keçirilmesini teminler”, – dedi Avropa Parlamentiniñ deputatı Yeji Büzek.

Ukraina, Moldova, Beyaz Rusiye ve Cenübiy Kavkaz boyunca Avropa tışqı alâqalar hızmeti şarqiy ortaqlıq bölügi başınıñ muavini Raynhold Brender ile körüşüv devamında Qırımtatar halqınıñ aqlarını ğayrıdan tiklev meseleleri boyunca halqara forumnı bu sene noyabr ayında Vilnüste Avropa Birliginen Ukraina birligi aqqında añlaşmanıñ imzalanmasına azırlıq çerçivesinde keçirüvniñ müimligi ve mümkünligi muzakere etildi.

Abduraman Egiz Ukrainanıñ Avropa Birligine qatılması içün faallik köstergen Meclisniñ açıq pozitsiyası Ukrainada belli olğanını ayrıca qayd etti.

Bunıñ kibi de Avropa Parlamentiniñ deputatları. Avropa Parlamentiniñ Rusiyenen alâqalar boyunca delegatsiya başı Knut Flekenşteyn, Bernd Posselt(Almaniya), Tune Kelam (Estoniya), Leonidas Donskis (Litvaniya, Pavel Zalevski (Poloniya) ve Hollandiyalı qırımtatarı Emine Bozkurt ile de körüşüvler oldı.

Avropa Parlamentiniñ deputatları Mustafa Cemilevniñ mektübinde Ukrainada qırımtatar halqınıñ vaziyeti ve qırımtatarlar meselesi boyunca halqara forum keçirmesiniñ zarurlığına ait malümatlar içün teşekkür bildirdiler.

Şunı da qayd etmeli ki, yuqarıda qayd etilgen körüşüvler devamında qırımtatar meselesini çezüvde halqara cemaatçılıq ve Avropa parlamenti deputatlarınıñ tarafından körülecek çare-tedbirler, halqara forumnı keçirüvge qoltutuv meseleleri de baqıldı.