Meclis reisinini muavini Remzi İlyasov Ukraina Tışqı İşler nazirliginden izaat bermesini rica etti

24 Iyül 2013

Ukrain elçileri Qırımdaki qırımtatarlarnıñ yerleşmesine yardım sorap qırımtatar diasporasına muracaat etkenleri munasebetinen Qırım parlamentiniñ deputatı, Meclis reisiniñ muavini Remzi İlyasov Ukraina Tışqı işler naziri Leonid Kojarağa deputat soravını yolladı.

Onda deputat Kononenko S.A. cenapnıñ areketleri şahsen kendisiniñ teşebbüsi olğanı ya da o, Ukraina Tışqı işler nazirliginiñ avalesini becergenini añlatmasını rica ete.

Bundan da ğayrı R. İlyasov Ukraina Tışqı işler nazirligi angi halqara teşkilâtlarından Ukrainadaki qırımtatarlarnı yerleştirüvde yardım sorağanını haber etmelerini soray. Eger de böyle muracaat olğan olsa, oña yollamalarını rica etti.

“Avdet” gazetası yazdı ki, Özbekistan cumhuriyetinde Ukraina işleri boyunca vaqtınca vekili olğan Kononenko S.A. “Avdet” qırımtatar medeniy merkezniñ reisi Nusret Cemilevge Özbekistanda yaşağan qırımtatar iş adamlarına Ukrainadaki semetdeşlerine maliyeviy yardım köstermelerini soramaqnı teklif etken. Muracaatqa qırımtatarlarnı yerleştirüv Programması boyunca qurulması közde tutulğan inşaatlarnıñ cedveli ve 91,153 biñ grivnâlıq masraflar smetası da ilâve etilgen.

Mezkür muracaat Ukraina Sotsial siyaset nazirligi ve Qırım Milletlerara munasebetler ve sürgün etilgen grajdanlarnıñ işleri boyunca cumhuriyet komiteti Devlet programması esasında halqara yardımnı celp etüv teklifinden kelip çıqqan.

Şunı qayd etmeli ki, bu malümat qırımtatarlarnıñ narazılığını qozğadı ve çeşit teşkilâtlarğa muracaatlarğa sebepçi olabilir. Bir taraftan Ukraina Sotsial nazirligi Devlet bücetinde sermiyalarnıñ qıtlığı sebebinden halqara yardım aqqında tüşünmek dey, asılında ise Ukrainanıñ resmiy şahsıları qırımtatar diasporasına baş uralar.

Kütleviy informatsiya vastalarında bu aqta “Ukraina ükümeti qırımtatarlarnı öz esaplarına yerleştirmek istey”, “Ukraina qırımtatarlardan 91 million talap ete” kibi serleva altında çıqqan yazılar mencesine Ukrainanıñ itibarını tüşüre, dey İlyasov.