Meclis reisiniñ muavini Remzi İlyasov milliy azlıqlarnıñ meseleleri boyunca avropalı mütehassılar ile körüşti

27 May 2013

Milliy Meclisni mayıs 24 künü milliy azlıqlarnıñ meseleleri boyunca Avropa merkeziniñ (Flensburg, Almaniya). ekspertleri ziyaret ettiler.

Körüşüvde Meclis reisiniñ muavini, Qırım Yuqarı Şurasınıñ deputatı Remzi İlyasov ve “Vatandaşlar cemiyetiniñ institutı” Qırım cemaat teşkilâtı keñeşininiñ reisi Rustem Ablâtif bir taraftan, Merkezniñ ekspertleri d-r Aleksandr Ösipov ve merkezniñ ilmiy hadimi Ganna Vasileviç- diger taraftan iştirak ettiler.

Ekspertlerniñ ricası ile R. İlyasov Meclis ve Qurultay kibi milliy idare qurumlarınıñ faaliyeti, qırımtatar halqı milliy areketiniñ tarihı aqqında ikâye etti.

Subetdeşler Qırım ve Ukrainadaki içtimaiy-siyasiye vaziyetni, milliy idare organı ve Qırım em de Ukraina akimiyetinen munasebetler ve yarımadada soñki vaqıtta olıp keçken vaqialar çerçivesinde qırımtatar halqınıñ alı muzakere etildi.

Avropalı mütehassıslar Ukraina ükümetiniñ milliy azlıqlarğa nisbeten siyaseti meraqlandırdı.

Remzi İlyasov şunı qayd etti ki, Ukrainanıñ mustaqillik devrinde devlet qırımtatar halqına nisbeten umummilliy seviyede bütün, devamlı siyasetni öyle de işlep çıqmadı. “Cümleden, qırımtatar halqınıñ ya da evel sürgün etilgenr şahıslarnıñ statusı alâ daa belgilenmedi”, – dedi Meclis reisiniñ muavini R.İlyasov.

Milliy azlıqlarnıñ meseleleri boyunca Avropa merkeziniñ ekspertleri qırımtatar milliy idare organlarınıñ iş faaliyeti unikal olaraq, dünyada böyle zengin ve qıymetli tecribege malik diger teşkilât tapılmaz. Olarnıñ fikrince qırımtatarlar tecribesi kitapta aks ettirilecek ve Balqanlardaki halqqa ibret olur.