Meclis reisiniñ muavini Aslan Ömer Kırımlı Belçika ve Almaniyada iş ziyaretinen bulundı

27 Yanvar 2014

Meclis reisiniñ muavini Aslan Ömer Kırımlı Belçika ve Almaniyada üç künlük iş ziyareti devamında bir sıra resmiy tedbirlerde iştirak etti

Cümleden Aslan Ömer Kırımlı Gissen Qırımtatar yardımlaşma ve medeniyet derneginiñ başı Rafet Qaranlıq ve Avropadaki qırımtatar diasporasınıñ liderleri ile körüşip, Meclis adından olarğa yapqan işleri içün teşekkür bildirdi. “Brüssel – Avropanıñ, Avropa Birligi, Avropa parlamenti ve NATO temsilcilikleri bugünğan, paytahtıdır. Biz Avropada temsil etilmemiz oğrunda birinci adımlarımıznı yaptıq”, – dedi Aslan Ömer Kırımlı.

Meclis reisiniñ muavini Türkiye Baş naziri Recep Tayip Erdogannıñ körüşüvlerinde de bulunıp, oña qırımtatar halqınıñ lideri Mustafa Cemilevniñ selâmını bildirmek imkânına nail oldı.

Bundan da ğayrı A. Ömer Kırımlı iş ziyareti çerçivesinde baş nazir mesleatçıları Yalçin Akdogan, Mucahit Arslan ve İbrahim Kalın ile körüşip, Ukraina ve Qırımdaki soñki vaqialar aqqında tarif etti.

Ziyaret devamında Brüssel lobbi teşkilâtlarınıñ vekilleri, Türkiyeniñ Avropa Birligindeki daimiy vekili Selim Yener, Azerbaycannıñ elçisi Fuad İskenderov ve Avropa parlamenti ve Avropa Birligi vekillerinen körüşüvler olıp keçti.

Eki taraflı körüşüvlerniñ soñunda Aslan Ömer Kırımlı Türkiyeniñ Avropadaki TÜSİAD temsilciligi forumında qatıldı.

“Biz mında TÜSİAD temsilcisi Bahadır Kaleağasınıñ daveti ile keldik. Bizim, Qırım halqara biznes birleşmesi olaraq, maqsadımız avropa forumlarında faal iştirak etmektir. Bu munasebetnen vekâletlikniñ çeşit modellerini baqamız”, – dedi Aslan Ömer Kırımlı.

Diger tedbirler sırasında Aslan Ömer Kırımlı Avropa parlamentiniñ avropa iqtisadiy alan ve kenişletüv bölüginiñ başı Tomas Grunert ile körüşip, onı Qırımğa davet etti.

Ziyaretniñ soñki künü Meclis reisiniñ muavini Kanal Avrupa televizion kanalında bulunıp, Ali Paşa Akbaşem ve kanal direktorı Seran Sargurnen körüşip, olarğa Avropa kanalında kösterilgen “Yeşil Ada Qırım” yayını içün teşekkür bildirdi.

Belçika ve Almaniyağa ziyaret devamında Aslan Ömer Kırımlığa Meclisniñ Almaniyadaki temsilcisi Ahmet Ozay refaqatlıq yaptı.