Meclis reisiniñ birinci muavini Refat Çubarov tabiat afatından zarar körgen Temelli qasabasını ziyaret etti

20 Fevral 2012

“Qırımda qalın qar yağıp, şiddetli ruzgâr kötergen qum boranları artından qattı suvuq olğanına endi 10 kün keçse de, alâ daa qar ve qum obaları tübünde qalıp ketken qasabalar bar, – dep yaza Facebooktaki öz saifesinde Meclis reisiniñ birinci muavini, Qırım Yuqarı Şurasınıñ deputatı Refat Çubarov.

2012 senesi fevral 18 künü Aqmescit rayonı Rodnikovoye köy şurasına baqqan, qırımtatarlar toplu yaşağan Temelli qasabasına barıp, doğrusını aytsam, biri-birine qarışqan bu qadar qar ve qum körerim, dep iç zan etmedim.

Bazı yerlerde obalarnıñ yüksekligi 2 metrge yete. Vefqulade adiseler nazirligi hızmetiniñ hadimleri Lenin rayonından mahsus tehnika kelgen soñ qasaba yollarını temizlemege söz berdiler. Men bellesem, 1 000 kübmetr qadar basılğan qumnen qar qarışıq obalarnı parça-parça kesip temizlemek mümkün olur. Bazı aileler evlerini qızdırmaq içün qışlıq azırlağan odun ve kömürlerine bile yaqınlaşıp olamaylar. Er şey çamurlı qar astında qalğan.

Gaz borularını körip, mında gaz bar eken, dep yañılmañız. Zarar körgen soqaqlardaki borular daa faydalanuvğa tüşürilmedi”.

Refat Çubarov bunıq kibi de Temelli qasabasında çekken fotoresimlerni de yerleştirgen. Onıñ aytqanına köre resimler bile tabiat afatı ketirgen zararnıñ miqdarını aks ettirip olamaylar.