Meclis reisiniñ birinci muavini Refat Çubarov Öleg Rodivilovnıñ aqaretleyici sözleri boyunca prokuraturağa muracaat etmek meramında

30 November 2012

Meclis reisiniñ birinci muavini Refat Çubarov “Russkiy blok” partiyası Qırım teşkilâtınıñ başı Öleg Rodivilovnıñ aqaretleyici sözleri boyunca prokuraturağa muracaat etmek meramında, dep haber ete http://reeana.com/

Noyabr 29 künü “Krım” DTRK efirinde “Açıq siyaset” tok–şousında radikal ğayeleri sebebinden bir sıra devletlerde yasaq etilgen “Hizb ut-Tahrir” firqasınıñ faaliyeti muzakere etildi. Yayınğa “Hizb-ut Tahrir” firqasınıñ azaları ve bunıñ kibi de Meclis reisiniñ birinci muavini Refat Çubarov, Bağçasaray regional meclis reisi Ahtem Çiygoz, Qırım Yuqarı Şurasınıñ deputatı Sergey Aksönov davet etildiler. Studiyada bulunğan “Russkiy blok” partiyası Qırım teşkilâtınıñ başı Öleg Rodivilov öz çıqışında tok-şouğa “qanunsızlar ziyafeti” diye qıymet kesip, Aqmescit rayonı Saraylı Qıyat qasabasında öz başına topraq alğanlarnı tezden “senekler üstünde alıp çıqarlar” dedi.

Bu çıqışqa cevap olaraq Qırım Yuqarı Şurasınıñ deputatı Refat Çubarov Öleg Rodivilovnıñ aqaretleyici sözleri boyunca prokuraturağa muracaat etecegini bildirdi.

Bunıñ kibi de Refat Çubarov qırımtatar toplumı içinde böyle bölünüvler olğanda akimiyet başına çeşit alçaqlar kele, dedi.