Meclis reisiniñ birinci muavini Refat Çubarov esnafçı usta Rustem Maqsudovnı qızı doğğanınen hayırladı

09 Aprel 2012

“Qırımnıñ Canköy rayonında Rustem ve Lilâ Maqsudovlarnıñ ailesi yaşamaqta. İstisalda qazalanğan Rustem beyge yürmek zor olğanına baqmadan, o, milliy esnaflarnı ğayrıdan tiklev işinde endi bayağı hızmet kösterdi. Bir çoq sergi ve çeşit halqara yarışlarnıñ iştirakçisi olğan R. Maqsudovnıñ işlerine kollektsioncılar ve müzey hadimleri pek yüksek qıymet keseler.

Onıñ ömür arqadaşı Lilâ hanım eV ocağınıñ qoruyıcısı ve merhametli anadır. Bu acayip ailede keçenlerde daa bir qız dünyağa keldi. Qızçıqqa siyrek rastkelgen eski qırımtatar Sabbe adını berdiler. Üyken qızları – dörtünci sınıfta oquğan Zeranıñ sevimli qız qardaşçığı bar”, – dep yaza Refat Çubarov Facebook içtimaiy ağında özüniñ şahsiy saifesinde.

Meclis reiisiniñ birinci muavini, Qırım Yuqarı Şurasınıñ deputatı R. Çubarov Kezlevli iş adamları Zeynur ve Dilâra Yaqubovlar, Dilâver Mambetov, Qırımtatar halqı Meclisi reisiniñ mesleatçısı İsmet Yüksel, “Yañı dünya” gazetasınıñ jurnalisti Zera Bekirova, Meclis azaları Sadıh Tabah, İslâm Halilov, Ruslan Qurtseitov, Canköy regional meclis reisi Rustem Ennanov, regional meclis azası Enver Qasımovlarğa Maqsudovlarnıñ ailesine bala doğuvı munasebetinen samimiy hayırlavları ve bahşışları içün teşekkür bildirdi.

“Şunı da bildirmek isteyim ki, bu künden itibaren Maqsudovlar ailesi ATR kanalınıñ yayınlarını seyir etmek imkânına malik oldılar, – dep haber ete Refat Çubarov. – Aile azalarınıñ quvançı sıñırsız edi. Bundan soñ olar qırımtatar tilinde yayınlar, bilhassa balalar içün meraqlı programmalarnı seyir ete bileler”.