Meclis reisi Yañı Sarabuz (Ukromnoye) köyünde yanğından zararlanğan aileni ziyaret etti

10 October 2012

Qırımtatar halqı Meclisine Yañı Sarabuz (Ukromnoye) köyünde 2012 senesi oktâbr 6-dan 7-ge keçer gecesi Edem Seytumerovnıñ evi yanğanı ve aqibette eV yanındaki qoşumca qurulmalar da ateşten ğayıp olğanı aqqında haber keldi. 200 kvadrat metr mesken eV içindeki bütün eşyalar ile beraber ateş içinde qaldı. Yanğın başlanğanda aile azaları yuqlay ediler, amma bahtqa qarşı er kes sağ qaldı.

Oktâbr 10 künü Qırımtatar halqı Meclisiniñ reisi Mustafa Cemilev Aqmescit regional meclis reisi Lemmar Yunusov, Yañı Sarabuz köy meclisiniñ reisi Rustem Refatov, “Qırım” Fondı” hayriye teşkilâtınıñ baş müdiri Riza Şevqiyev ve milliy areket veteranlarınen beraber felâket yüz bergen yerge keldi.

“Gece saat 2-lerde men ateş yanğanını kördim, – tarif ete adiseni eV saibi Edem Seytumerov. – Yanğın hocalıq qurulmalarından çıqtı. Biz evden atılıp tışarı çıqtıq, ateşni söndürecek olıp tırıştıq, amma küçümiz yetmedi”. E. Seytmuyerovnıñ aytqanına köre o, ateş söndüricilerni, vefqulade hızmet hadimlerini çağırğan, lâkin olarnıñ arabalarında ateşni söndürmek içün suv bile yoq eken. “Suv ketirmelerini beklegence ateş evimizni tolusınen yoq etti”, – dey Seytumerov.

Bütün bar-yoqunı qurucılıqqa sarf etken Ev saibi bu iş mahsus yapılğanı ve qabaat qomşusında olğanını tahmin ete. Zarar körgen eV saibiniñ aytqanına köre qomşusı içkicilikke qarardan ziyade berilip, evinde özü kibi içkicilernen birlikte daima “alkogol oturışları” keçire eken. “Men onı defalarca tertip-nizamğa çekmege tırıştım, lâkin faydası olmadı.

Men eminim ki, qomşumnıñ areketleri neticesinde evim yandı, ailem de az qaldı öleyazdı”, – bildirdi Edem Seytumerov. Ve şunı da ilâve etti ki, yanğın söndürüv hızmetiniñ hadimleri eV esalet yaqılğanını isbat etmekniñ çaresi yoqtır, bunıñ içün pek paalı ekspertiza kerek.

Neticede, E. Seytumerovnıñ sözlerine köre, yanğıncılar yanğınnıñ sebebi elektrik ağlarınen bağlı, degen hulâsanı çıqardılar.

Yañı Sarabuz köyüniñ cemaatı köydeşlerine yardım qolunı uzattılar. Yerli meclis ve köy faalleriniñ areketi sayesinde 15 biñ grivnâ para toplandı. Aqraba ve dostları ise evniñ damını qapatıp, yañı qurucılıqnı başladılar.

Meclis reisinen subet devamında Edem Seytumerov Mustafa Cemilevden ait hızmetlerge muracaat etip, evniñ bir qısmını gaznen teminlev meselesini çezüvde yardım bermesini rica etti. “Kiçkene balaçıqlarımız bar, olar içün suv qızdırmaq ve aş pişirmekniñ imkânı yoqtır”, – dep añlattı ricasını E. Seytumerov. Meclis reisi bu meseleni öz nezareti altına alıp, müsbet çezilmesine tırışacağını işandırdı.

Milliy areket veteranları ev yanğan azbarda dua oqudılar ve Seytumerovlarnıñ ailesine eñ zarur erzaqlarnı berdiler. Öz tarafından “Qırım” Fondı” hayriye teşkilâtınıñ baş müdiri Riza Şevqiyev de ailege maddiy yardım berdi.