Meclis reisi : Vaziyetniñ kerginleşmesine sebep olğan meselelerni beraber muzakere etmek içün Ukraina Yuqarı Şurası ve Qırım Yuqarı Şurası (er biri öz tarafından) bugünden başlap Mahsus deputat komissiyalarını tizmek kerek

03 Mart 2014

Qırımtatar halqı Meclisi reisiniñ beyanatı

2014 senesi mart 3
Aqmescit ş.

Qırımda meydanğa kelgen vaziyetni çezmek meselesi halqara seviyege köterildi. Lâkin çezim yolları deral bugün- yarın Ukrainanıñ içersinde tapılmalı.

Menim teklifim:

Vaziyetniñ kerginleşmesine sebep olğan meselelerni beraber muzakere etmek içün Ukraina Yuqarı Şurası ve Qırım Yuqarı Şurası (er biri öz tarafından) bugünden başlap Mahsus deputat komissiyalarını tizmeleri kerek.

Ukraina Yuqarı Şurasınıñ mahsus deputat komissiyasınıñ erkânına Qırımda yaşağan ve em majoritar daireleri, em siyasiy partiyalardan saylanğan halq deputatları kirsetilmeli.

Qırım Yuqarı Şurasınıñ Mahsus deputat komissiyasında epsi fraktsiyalarnıñ deputatları temsil etilmeliler. Birlikte yapılacaq muzakere iç bir türlü ultimatumlardan başlanmaycağı aqqında söylemek artqaçtır.

Eminim ki, bu işniñ başı endi cemiyet içün müim bir siltem olur ve kerginlikni yatıştırmağa imkân berir.