Meclis reisi Ukrainada Halqara migratsiya teşkilâtı vekâletliginiñ başı ve Ukrainada Birleşken Milletler Teşkilâtı Aliy Komissar idaresi vekâletliginiñ yolbaşçısınen körüşti

08 February 2013

2013 senesi fevral 5 künü Ukraina Yuqarı Şurasınıñ İnsan aqları ve milletlerara munasebetler boyunca komitette Ukrainada Halqara migratsiya teşkilâtı vekâletliginiñ başı Manfred Profazi ile körüşüv olıp keçti. Körüşüvde Komitet reisi Valeriy Patskan, Meclis reisi, Ukraina halq deputatı Mustafa Cemilev, halq deputatları İvan Popeskun, Bogdan Benük, Vekâletlikniñ ve Komitetniñ hadimleri iştirak ettiler. 

Körüşüv devamında bir sıra müim meselelernen birge migratsiya saasında içtimaiy ve iqtisadiy problemler de muzakere etildi. Dialog iştirakçileri migratsiya saasına ait qanunlarnı Avropa standartlarına uyğunlaştırmaq meselelerinde işbirlik yollarını bulmaq hususında fikir paylaştılar. 

Meclis reisi Mustafa Cemilev M. Profazige Qırımda milletlerara munasebetler boyunca, qırımtatarlarğa nisbeten menfiy areketler aqqında aytıp, muhtariyat ükümetinde qırımtatar temsilcileriniñ sayısı ep eksilgenini, akimiyet qırımtatarlar arasına şına qaqmaq areketlerini qayd etti. Bunıñ kibi de OSCE reberligi altında Qırımtatar halqınıñ aqlarını ğayrıdan tiklev meseleleri boyunca halqara forum keçirüv aqqında da aytıldı. 

Manfred Profazi vaziyetni ögrenmek içün eñ yaqın vaqıtta Qırımnı ziyaret etmek maqsadını bildirdi. Zira bir de bir halqnı milliy ya da diniy mensüpligine köre aqmalanmasına qarşı çare-tedbir körmek o temsil etken teşkilâtnıñ doğrudan-doğru vazifesidir. 

Bir kün keçken soñ Komitette aynı böyle körüşüv Ukrainada Birleşken Milletler Teşkilâtı Aliy Komissar idaresi vekâletliginiñ yolbaşçısı Oldrih Andrusek ile oldı.

Öz çıqışında O. Andrusek BMT Aliy Komissarı faqat qaçaqlarnıñ menfaatlarını qayğıruvnen sıñırlanmadan, stalin rejimi tarafından sürgün etilgen halqlarnı da qorçalağanını qayd etti. Bu esnada o Qırımtatar halqınıñ Meclisinen çoq yıllardan berli devam etken semereli işbirlikni, Aliy Komissar Sadako Ögatanıñ Qırımğa mahsus ziyaretini, Aliy komissar idaresi tarafından Mustafa Cemilev F. Nansen mukâfatınen taqdirlengenini hatırlatıp, Halqara forum aynı BMT Aliy komissarı idaresiniñ imayesinde keçirilecegini söyledi.