Meclis reisi Türkiye Cumhuriyetiniñ bayramında iştirak etti

29 Oktâbr 2011

Qırımtatar halqı Meclisiniñ reisi Mustafa Cemilev ve onıñ  refiqası, Qırımtatar qadınlar birliginiñ reisi Safinar Cemileva Türkiyeniñ Ukrainadaki Vefqulade ve Toluvekâletli Elçisi  Ahmet Bülent Meriçniñ daveti boyunca  Türkiye Cumhuriyetiniñ 88 yıllığı munasebeti ile tantanalı tedbirde iştirak ettiler.

2011 senesi 28 oktâbr künü Türkiyeniñ Ukrainadaki Elçihanesi  Türkiye Cumhuriyetiniñ eñ büyük milliy bayramı – Cumhuriyet ilân etilgeniniñ 88 yıllığı ve  aynı zamanda Mustafa Kemal Atatürk Türkiye Cumhuriyetiniñ Prezidenti  olaraq saylanğanı munasebetinen  tantanalı aqşam teşkil etti.

Kiyevdeki “Hyatt” öteliniñ restoranında olğan resmiy qabulda Türkiyeniñ Ukrainadaki Vefqulade ve Toluvekâletli Elçisi   Ahmet Bülent Meriçniñ şahsiy davetinen  Qırımdan diger musafirler – Türkiye Cumhuriyetiniñ Aqmescitteki  fahriy  konsulı  Seyran Osmanov, Meclis azası Sadıh Tabah , Kiyevde qırımtatar cemiyetiniñ başı  Aslan Ümerov, “Can yürekten” hayriye fondınıñ reisi Ebazer Emiraciyev ve Qırımtatar halqı 5-nci çağırılış  qurultayınıñ delegatı  Bekir Ğaniyev de bulundılar.

Malümat içün: 1923 senesi oktâbr 29 künü Türkiye cumhuriyet olaraq  ilân etilip, onıñ birinci prezidenti etip Mustafa Kemal saylandı.  

Cumhuriyet künü – Türkiyeniñ baş devlet bayramıdır. Bu künü tantanalı parad ve umumhalq eglenceleri keçirile. Soqaqlarda  milliy bayraqlar asıla, mekteplerde  tantanalı tedbirler teşkilâtlandırıla. Bayram meşur sanatçılarnıñ  çıqışları, şeñ-şerametlik ile yekünlene.