Meclis reisi Refat Çubarov V. Konstantinov öz tüşüncelerinen Rusiye küç qurumlarını Qırım vaziyetine qarışmağa çağırdı, dep saya

20 Fevral 2014

“Devletimizde neler olğanından qatiy nazar – bu bizim memleketimiz, bu Ukrainadır!! Şunıñ içün de, böyle bir telâşlı vaqıtta nasıldır regionlarnıñ yolbaşçıları eger Kiyevde biz begenmedigimiz akimiyet olacaq olsa, biz hududımıznı Ukrainadan ayırmaq areketlerini yapmağa azırmız, diye böyleliknen bu insanlar Kiyevde atqan insanlar yapqan cinayet kibi cinayet işleyler, – dedi Meclis reisi Refat Çubarov Kütleviy matbuat vastalarına Qırım parlamentiniñ başı V. Konstantinovnıñ Moskvada memlekette vaziyet kerginleşkeni taqdirde Qırımnı Ukrainadan ayırmaq tahminine izaat berirken.

Refat Çubarov emin ki, böyle çıqışlarnı yapqan insanlar mıtlaqa cezalanmaq kerekler.

” Qırım Yuqarı Şurasınıñ reisi olaraq V. Konstantinov Moskvada bulunğanda böyle beyanatnen çıqmasını men doğrudan-doğru fesat, Rusiye küç qurumlarına “sessiya toplap siz bizlerden beklegen ve kendimiz de bunı istegen qararlarnı almamız içün bir şey yapıñız” degen kibi Qırımğa çağıra, dep sayam, – qayd etti Meclis reisi.

Refat Çubarov dedi ki, qırımtatarlar Konstantinov kibi siyasetçilerniñ “beyanatları”nıñ kerçekleşmesine yol bermezler. “Memleket içün böyle bir ağır vaqıtta bu siyasiy dolandırıcılıqtır, – dep qayd etti Meclis reisi. – Qırımtatarlar bunı yapmağa yol qoymazlar! Bu Qırımda yaşağan er kesniñ ve bizim de toprağımızdır. Bizim başqa Vatanımız yoqtır. Biz birlikli devlette qalırmız, “Konstantinovlar” ise kelir ve keterler”.

Meclis reisi Refat Çubarovnıñ fikrince Ukrainada vaziyet yoluna mingen soñ Konstantinov cezalanır.