Meclis reisi Refat Çubarov Ukraina Yuqarı Şurasınıñ İnsan aqları boyunca vekâletli Valeriya Lutkovskaya ile körüşti

03 Mart 2014

Meclis reisi Refat Çubarov 2014 senesi mart 3 künü Qırımğa Ukraina vatandaşları ve Qırım Muhtar cumhuriyetinde yaşağan diger devlet vatandaşları, bunıñ kibi de Ukraina Arbiy Küçleri arbiyleriniñ aqları teminlenmesini talil etmek maqsadınen kelgen Ukraina Yuqarı Şurasınıñ İnsan aqları boyunca vekâletli Valeriya Lutkovskayanen körüşti

Taraflar soñki künlerde Qırımda olıp keçken vaqialar aqqında malümatlarnen paylaşıp, Qırımda meydanğa kelgen vaziyet çeziminiñ yollları ve usullarını muzakere ettiler.

Refat Çubarovnıñ fikirince bugünde-bugün Ukraina Yuqarı Şurası ve Qırım Yuqarı Şurasınıñ deputatlarından ibaret tizilgen mahsus komissiyaları vaziyetniñ keskin kerginleşmesine sebep olğan meselelerni birlikte baqıp çıqmalılar.

Ombudsmen Valeriya Lutkovskaya Meclis reisi Refat Çubarovnıñ fikirine qoltutıp, vaziyetniñ çezimi faqat siyasiy esnada yapılmalı, dep qayd etti. Valeriya Lutkovskaya şunı da qayd etti ki, Ukraina Yuqarı Şurasınıñ İnsan aqları boyunca vekâletli ofisiniñ baş vazifesi insan aqlarını qorçalamaq ve Qırımda barışıq ve tınçlıqnı teminlemektir.

Körüşüvde Meclis reisiniñ muavini Nariman Celâlov, bunıñ kibi de Ombundsmen vekilleri Mihail Çaplıga ve Yuriy Belousov, Ukraina Yuqarı Şurasınıñ İnsan aqları boyunca vekâletliniñ Qırımdaki temsilcisi Natalya Şarova iştirak ettiler.