Meclis reisi Refat Çubarov Türkiye baş naziri Recep Tayip Erdoğan ile körüşti

04 Fevral 2014

Almaniyada eki künlük iş ziyaretinen bulunğan Meclis reisi Refat Çubarov ve onıñ muavini Aslan Ömer Qırımlı Berlinde Bündestag deputatları ve Almaniyanıñ ükümetten tış teşkilâtlarınıñ vekillerinen körüşüvler keçireler. Körüşüvlerde qırımtatar halqınıñ Ukrainada vaziyeti ve halqara ükümet ve Avropa devletlerindeki ükümetten tış teşkilâtlarnıñ qırımtatar halqı aqlarınıñ ğayrıdan tiklenmesinde rolü meseleleri muzakere etilmekte.

2014 senesi fevral 3 künü Berlinde bunıñ kibi de Almaniyada resmiy ziyaretnen bulunğan Türkiye Cumhuriyetiniñ baş naziri Recep Tayip Erdogan ve oña refaqatlıq yapqan delegatsiya azalarınen bir sıra körüşüvler oldı.

Meclis reisi Refat Çubarov ve onıñ muavini Aslan Ömer Qırımlı Türkiye baş naziriniñ muavini Emrullah İşler, Türkiye Tış işleri naziri Ahmet Davutoglu, Türkiye ükümeti Türk aqrabaları ve yurt tışındaki türklerniñ işleri boyunca başqanı Kemal Yurtnaç, Türkiyeniñ Almaniyadaki Büyük Elçisi Avni Karslioglu ile ayrıca körüşüvler keçirdiler. Bu körüşüvlerde Meclisniñ Almaniyadaki vekili Ahmet Ozay iştirak etti.

2014 senesi fevral 3 künü Meclis reisi Refat Çubarov ve onıñ muavini Aslan Ömer Qırımlı Türkiye Baş naziri Recep Tayip Erdogan ve Türkiye ükümeti delegatsiyası azalarınıñ Almaniyadaki 30 cemaat teşkilât reberlerinen körüşüvinde musafir olaraq iştirak etip, çıqışta bulundılar.

2014 senesi fevral 3 künü aqşam Meclis reisi Refat Çubarov Türkiye Baş naziri Recep Tayip Erdogan ile körüşti.

Körüşüvde Meclis reisiniñ muavini Aslan Ömer Qırımlı Türkiye baş naziriniñ muavini Emrullah İşler, Türkiye Tış işleri naziri Ahmet Davutoglu, Gençler ve sport naziri Akif Çagatay Kılıç, Türkiyeniñ Almaniyadaki Büyük Elçisi Avni Karslioglu ve Meclisniñ Almaniyadaki vekili Ahmet Ozay da iştirak ettiler.

Körüşüvde Refat Çubarov Türkiye Baş naziri Recep Tayip Erdoğanğa Ukraina ve Qırımda olıp keçken adiseler esnasında qırımtatar halqınıñ vaziyeti, Meclisniñ qırımtatar halqı meselelerini çezmek ve ukrain cemiyeti yaşağan siyasiy iñqırazdan çıquv yollarını tapmaq maqsadında Ukraina yolbaşçılarınen dialog qurmaq boyunca areketleri aqqında malümat berdi.

Körüşüv devamında Halqara forum keçirilmesi ve Qırımda Türkiye ükümeti ve halqara teşkilâtlarınıñ iştirakinde Qırımda gumanitar leyhalarnı amelge keçirmek, şu cümleden qırımtatarlar toplu yaşağan yerlerde mesken ve mektep, Aqmescitte Medeniyet merkezi ve Büyük Cuma camini qurmaq meselelerine esas diqqat ayırıldı