Meclis reisi Refat Çubarov Tatarstan Prezidenti Rustam Minnihanovğa taziye bildirdi

18 Noyabr 2013

Qırımtatar halqı Meclisiniñ reisi  Refat Çubarov Tatarstan Prezidenti Rustam Minnihanovğa, noyabr 17 künü aqşam Qazan ava limanında  uçaq qonmağa azırlanğanda yüz bergen qaza aqibetinde elâk olğan insanlarnıñ ailesi ve aqrabalarına taziye bildirdi.

“Başıñızğa kelgen büyük yanıq – aviaqazağa oğrağan uçaqta başqa yolcularnen beraber bulunğan oğluñız İrekniñ  elâkı bizlerni de kederlendirdi. Siz ve aileñiz ile beraber yanıqlaymız, – denile  Meclisniñ taziyesinde.  – Yüce Allah Sizge ve aileñizge, elâk olğanlarnıñ ailelerine bu ağır künlerde sabır ve taqat bersin”.

Malümat:  2013 senesi noyabr 17 künü aqşam  “Qazan” ava limanında  qonmağa alçalğan  “Boing 737” uçağı patladı. Uçaqta 44 yolcu ve ekipajnıñ 6 azası bar edi.  Al-azırda  araştıruv-qurtaruv işleri alıp barıla. “Tatarstan” aviakompaniyasına ait  uçaq Moskvanıñ “Domodedovo” ava limanından uçıp kelmekte edi.