Meclis reisi Refat ÇUBAROV «Tatargosdram teatr» artisti Saniye Nalbantovanı 95 yaşınen hayırladı

01 Noyabr 2013

Bugün eñ istidatlı qırımtatar aktrisalardan biri, pek çoq yırlarnıñ ve ustda icracısı sürgünlikten evelki “TatarGosdram teatr” sanasında parlaq rollerni yaratqan Saniye Nalbantova 95 yaşını qayd etmekte.

Sabadan ta keç maalgece bu parlaq şahısnı musafirler, Qırımtatar akademik muzıkalı drama teatriniñ artistleri ziyaret etmekteler.

Hansarayda olğan tantanalı merasimden soñ Milliy Meclis reisi Refat Çubarov ve Meclis azası Sadıh Tabah Saniye Nalbantovanı yubiley ile hayırlamağa keldiler. Meclis reisi milliy teatr sanatınıñ inkişafına qoşqan salmaqlı issesi içün sanatçığa samimiy minnetdarlığını bildirdi.

Milliy Meclis reisi Refat Çubarov ve Meclis azası Sadıh Tabah Saniye hanımnı Meclis adından hayırlap, çeçek ve bahşışlar bağışladılar.

Musafirler Saniye hanımğa uzun ömür, qaviy sağlıq ve tendüristlik tilediler. Meclis azalarınen bir sırada Saniye hanımnı III çağırılış Qurultayınıñ delegatı Beyye İlyasova ve ATR telekanalında “Tarih” sedası programmasınıñ müellifi ve alıp barıcısı Gülnara BEKİROVA da hayırladılar.