Meclis reisi Refat Çubarov: Serbestlikke ıntıluvda ukrain milleti ve onıñ ile beraber qırımtatar halqını da iç bir kimse toqtatıp olamaz!

22 Yanvar 2014

2014 senesi yanvar 24 künü Aqmescitte Taras Şevçenko adına parkta Ukraina Birliginiñ kününe bağışlanğan tantanalı miting olıp keçti.

Mitingde Meclis reisi Refat Çubarov, Meclis azaları, ukrain milliy-demokratik ve qırımtatar cemaat teşkilâtlarınıñ vekilleri, Qırım Yevromaydan faalleri ve Qırım cemaatçılığınıñ temsilcileri iştirak ettiler.

“Serbestlikke ıntıluvda ukrain milleti ve onıñ ile beraber qırımtatar halqını da iç bir kimse toqtatıp olamaz! Bayramnen hayırlayım ve küreşke çağıram! Bugün endi añlaşıldı ki, insanlarnı toqtatacaq mania yoqtır, – dedi eminliknen Meclis yolbaşçısı. – Bugün insanlarnı öldürip de, bütün bir halqnı ögü qapalı soqaqqa aydaycaqlar, dep bellegenler öz allarını fenalaştıralar. Mahkeme olur ve olar mıtlaqa cezalanırlar. Mıtlaqa cezasını çekecekler!”

Meclis reisi Refat Çubarov bugün halq ile beraber serbestlik taba ketmek kerekliginde emin. Ukraina Halq Cumhuriyetini ilân etken ve Ukrainanı birleştirmek qararını alğan insanlarnıñ hatırası bugün Ukrainanıñ bütün vatandaşlarını birleştirmekte.

Birleşüv künü – Ukrainanıñ yanvar 22-de 1919 senesi Ukraina Halq Cumhuriyeti ve Ğarbiy Ukraina Halq Cumhuriyetiniñ birleşkeni aqqındaki akt ilân etilgen künü er yılı qayd etilmekte.

Ukraina Birliginiñ künü Devlet bayramı olaraq Prezidentniñ 1999 senesi yanvar 21-deki Fermanı ile tesis etildi.