Meclis reisi Refat Çubarov: Qırımtatarlar olarnıñ inkişafı ve vatanlarınıñ inkişafına dair meselelerde qarar aluv subyektidirler

18 Mart 2014

Meclis reisi Refat Çubarov 2014 senesi mart 17 matbuat konferentsiyasında bildirgenine köre umumen Qırımda 185 biñ qırımtatar saylavcılarından ancaq 1 biñi mart 16 künü referendum diye adlandırılğan tedbirde iştirak etti.

Meclis reisi Refat Çubarov rey berilgen mart 16-da kün boyu çoqtan-çoq sahteliler, saylav dairelerinde reylerni qoşıp yazuv faktları qayd etilgenini de bildirdi.

R. Çubarov qırımtatar saylavcılarınıñ yüksek aktivligi aqqında malümatnı red etken sadece bir qaç misal ketirdi. Meselâ, Qarasuvbazar rayonınıñ Annovka köyünde yaşağan 290 insannıñ 200-i qırımtatarları olıp, olardan iç birisi rey bermegen. Amma referendum keçirüv komissiyası sanki bu köyde 111 insan rey berdi, dep ilân ete.

“Qırımtatarlar olmağan 90 saylavcınıñ episi referendumğa qatıldı, dep tahmin etsek bile bu raqam 111 degil de 90 olmaq kerek edi, yani 23% qoşıp yazılğan”, – dep añlattı Meclis reisi

R. Çubarovnıñ söylegenine köre, beñzer vaziyet Qırımnıñ bir çoq eali noqtalarında da közetildi. Bundan da ğayrı qırımtatarlar topnen yaşağan qasabalarda qırımtatarlar rey berüvde aslı da iştirak etmediler. “Bağçasaraynıñ qırımtatarlar topnen yaşağan 6 ve 7 mikrorayonlarında saylav uçastkaları umumen teşkil etilmedi, çünki qırımtatarları referendum azırlav ve keçirüvniñ bütün basqıçlarından vazgeçtiler”, – dedi R. Çubarov.

Meclis reisi añlattı ki, seslendirilgen malümatlar qırımtatarlar topnen yaşağan yerlerde çalışqan saylav komissiyalar işiniñ közetüvine esaslana. “Refrendumnı azırlağan ve keçirgen komissiyadan farqlı biz er bir raqam içün cevap beremiz”, – dedi R. Çubarov.

Meclis yolbaşçısı şuña da diqqatnı celp etti ki, Ukrainada keçirilgen evelki saylavlarnıñ episinde saylavcılar, cemaat aktivistleri, siyasiy partiya vekilleri, közetici ve jurnalistler olarğa protokollar kopiyası berilgenine alıştılar, amma bu sefer bu şey olmadı, çünki teşkilâtçılarnıñ iç birine bu kerek degil edi”.

Refat Çubarovnıñ fikrince Qırım inqirazında eñ menfiy tarafı şu ki, böyle vaziyetniñ yüz bermesine sebepçi olğan “yetekçi oyuncılar” insanlarnı aqaretleyerek, olarnıñ istegi ve aqqı olmağanı alda “zarur qarar almağa” mecbur ettiler.

“Em bu yalıñız qırımtatarlarına degil, bütün Qırımğa aittir, – dedi Meclis reisi. – Bugün referendum denilgen şeyden eyforiyada bulunğan insanlar yarın olarnı bu alğa qaldırğan insanlardan cevap talap eterler”.

Meclis reisi R. Çubarov bunıñ kibi de qayd etti ki, qırımtatarlarnıñ kendileri ve olarnıñ vekâletli organları Qurultay ve Meclis ile muzakere etilmeyip qırımtatarlar adına tüşken teşebbüslerni qatiyen red ete.

“Qırımtatarlarlar o ya da bu areketler ve qararlar yönetilgen obyekt olaraq baqılğan vaqıtlar çoqtan keçti, – dedi Refat Çubarov. – Artıq qırımtatarlarnıñ özleri, bilhassa, olarnıñ inkişafı ve vatanlarınıñ inkişafına dair meselelerde qarar aluv subyektidirler”