Meclis reisi Refat Çubarov: Qırımtatar halqı böyle istidatlı ocalarnen ğururlana. Olarnıñ sayesinde biz eminmiz ve qırımtatar tilini saqlap qaluv ve inkişafı oğrunda areketlerimizni quvetlendiremiz

16 Yanvar 2014

15-16 yanvar künleri Aqmescitteki Eşref Şemi zade adına ukrain ve qırımtatar tilinde oqutılğan 42 sanlı mektepte “2014 yılı ocası” Bütünukrain turınıñ “Qırımtatar tili” nominatsiyasında yekünleyinci turı ötkerildi.

Meclis idaresiniñ başı Emine Avamilevanıñ bildirgenine köre bu yılı “2014 yılı ocası” Bütünukrain turınıñ “Qırımtatar tili” nominatsiyasında başlanğıç sınıflarda qırımtatar tili dersini bergen ocalar ilk sefer iştirak etmekteler.

2014 senesi Bütünukrain yarışında şu yarışnıñ şeer ve rayon basqıçlarında ğalip çıqqan Kezlev, Aqmescit, Bağçasaray, Qarasuvbazar, Canköy, Qurman ve Aqmescit rayonlarından 7 nefer başlanğıç sınıf ocaları cumhuriyet basqıçına keçtiler, “Yarışnıñ birinci künü yanvar 15-te iştirakçiler jüri eyyetine öz pedagogik tecribelerini taqdim ettiler, test sınavlarını keçtiler ve ustalıqlarını numayış ettiler”, – dep ikâye ete Emine Avamileva.

Öz nevbetinde jüri reisi, filologiya ilimleri namzeti, Qırım müendislik-pedagogika universitetiniñ ocası Fera Seferova qayd etti ki, yarışnıñ ekinci künü er bir iştirakçi ocalıq ustalığını tanış olmağan sınıfta qırımtatar tili dersinde kösterip, keçirgen dersini özü talil etti. “Yarışçılar yüksek seviyede professional ustalıqnı, pedagogik meselelerni çezmekniñ yañı ğaye ve usullarını araştıruv qabiliyetlerini numayış ettiler”, – dedi jüri reisi.

“2014 yılı ocası” Bütünukrain turınıñ cumhuriyet basqıçında birinci yerni Aqmescitteki 29 sanlı mektep ocası Zamira Mametova, ekinci yerni Aqmecit rayonı Dobroye köy mektebiniñ ocası Mayya Canqlıç, üçünci yerni ise Bağçasaray 5 sanlı başlanğıç mektep ocası Albina Emiraliyeva qazandılar.

Bundan da ğayrı, yarış iştirakçileri Qarasuvbazar rayonı Vişennoye köy mektebiniñ ocası Elzara Üseinova, Canköy rayonı Pobednoye köy mektebiniñ ocası Anjela Yusupova, Kezlevdeki 18 sanlı mektep ocası Gülşide Suyunova, Büyük Onlar milliy mektebiniñ ocası Fatime Ablâyeva da taqdirlendiler.

Qırımda pek çoq sayıda olmağan, angileri ana-babalar, cemaatçılıq, qırımtatar halqı milliy idare organlarınıñ fedakârlığı sayesinde açılğan milliy mekteplerniñ birinde keçirilgen “2014 yılı ocası” Bütünukrain turınıñ “Qırımtatar tili” nominatsiyası ğaliplerini hayırlamaq içün Meclis reisi Refat Çubarov, onıñ muavinleri Ahtem Çiygoz ve Nariman Celâl, Meclisniñ qırımtatar tilinde tasil ve qırımtatar tilini Qırımnıñ devlet ve cemaat saalarına tadbiq etüv meseleleri boyunca idare reisi Emine Avamileva, Aqmescit regional meclis reisi Lemar Yunusov, Aqmescit, Bağçasaray, Qurman ve Qarasuvbazar rayonları şeer ve rayon şuralarınıñ qırımtatar tilinde tasil meselelerini nezaret etken deputatları keldiler.

Qırım Yuqarı Şurasınıñ deputatı Enver Abduraimov, Qırım Tasil naziriniñ muavini Lemara Selendili, jüri reisi Fera Seferova ve mektep direktorı Eskender Tarpandan ibaret prezidium içün sanada qoyulğan masa yarış ğalipleri içün bayram programmasını azırlağan 42-nci mektep talebeleriniñ göñüllerini qırdı. Çünki balalar milliy oyunlarnı sananıñ bir köşesinde sıqılıp, areketlerini sıñırlağanı alda icra etmek zoruna qaldılar. Ne içün sanada “masa” qoyulğanını mektep direktorı añlatıp olamadı.

Refat Çubarov Nariman Celâl , Emine Avamileva ve yerli şuralarnıñ deputatları ile birlikte yarış ğalipleri ve iştirakçilerine Meclisniñ fahriy yarlıqları, hatıra bahşışları, cümleden “Mustafa Cemilevniñ altıncı mahkemesi” kitabı, yarış logotipi ve tamğa olğan filcanlar, “ATR” televizion kanalı ve “Meydan” radoisından bahşışlar berdiler. Bundan da ğayrı Meclis adından Aqmescit şeer şurasındaki “Qurultay-Ruh” fraktsiyasınıñ deputatı Sadıh Tabah adından yarış iştirakçilerine para mukâfatları berildi.

“Yarışnıñ çoqdegerli ğalipleri ve iştirakçileri, musafir ve dostlar, bugün mında bayram ve biz siyaset aqqında aytmaq niyetimiz yoqtır, amma özüñiz añlaysıñız ki, ana tilinde tasil sistemasını qorçalav ve inkişaf ettirüv içün yapqan areketlerimizniñ özü endi büyük siyasettir, – dedi Meclis reisi Refat Çubarov. – Men böyle müim ve zarur yarış ğaliplerini hayırlamağa isteyim. İnsanlıq tarihında öz tilini coyğan halqlar da soñundan ğayıp olğanınıñ bir çoq misallerini ketirmek mümkün. 50 yıl devamında halqımız milliy mektep ve ana tili ocalarından marum edi. Vatanımızğa qaytqan soñ biz beraberlikte pek büyük bir iş yaptıq, lâkin, doğrusını söylesem, qırımtatar halqınıñ kelecegini teminlemek içün daa pek çoq iş yapmaq kerekmiz”.

Meclis reisi ana-babalarğa teşekkür bildirirken, milliy tasil sistemasınıñ saqlanıp qalması ve inkişafına salmaqlı isse qoşqan “Maarifçi” birleşmesiniñ hızmetini ayrıca qayd etti.

“Men bunıñ kibi şunı da qayd etmege isterdim ki, Qırımda iç bir mektep, iç bir sınıf Milliy Meclis ya da regional meclislerniñ yardımısız, semetdeşlerimizniñ fedaiyligi, ana-babalar, ocalar ve vatanperverlerniñ küreşisiz açılmadı”, – dedi R. Çubarov.

“2014 yılı ocası” Bütünukrain turınıñ “Qırımtatar tili” nominatsiyası ğalipleri ve iştirakçilerine hıtap eterek, Meclis reisi “Qırımtatar halqı böyle istidatlı ocalarnen ğururlana. Olarnıñ sayesinde biz eminmiz ve qırımtatar tilini saqlap qaluv ve inkişafı oğrunda areketlerimizni quvetlendiremiz” dedi ve ocalarğa kelecekte de qırımtatar halqı milliy idare organlarınen sıqı işbirlikte çalışmaqnı tevsiye etti.