Meclis reisi Refat Çubarov Qırımnıñ statusı acele uquqiy deñişmege muhtac ve mezkür deñişme qırımtatar halqınıñ öz özüni belgilemek aqqı taptalmasına yol bermeyceginde emin

05 Fevral 2014

“Soñki vaqıtta Ukrainada siyasiy iñqıraznıñ çezimine ümüt peyda olıp başlağanınen Rusiye Ukrainanı tolusınen imayesine almasınıñ tarafdarları olğanını gizlemegen siyasetçilerden bazılarınıñ bocalağanları sezilmekte. Buña irişilmese, iç olmağanda olar akimiyet başında olğan hududlarda amelge keçkenini isteyler”, – dedi Meclis reisi, Qırım Yuqarı Şurası “Kurultay-Ruh” fraktsiyasınıñ başı Refat Çubarov Facebookta öz saifesinde Qırım Yuqarı Şurası Prezidiumı azalarınıñ yarımadada vaziyet kerginleşkeni taqdirde Rusiyege yardım sorap muracaat etmek boyunca 2014 senesi fevral 4-te seslendirgen tekliflerine izaat berirken.

Refat Çubarov emin ki, bu işte eñ ziyade areketni Qırım Yuqarı Şurası Prezidiumınıñ monopartiya erkânına pek uyğun şekilde kirgen azaları kostereler. Belli ki, bu insanlar Qırımda 20-nci asırnıñ 90- ncı yıllarında Rusiyege yan basqan ayırımcılıq areketniñ vekilleri ediler.

Meclis reisiniñ fikrince er bir işte hayır bar, degenleri kibi memlekette akimiyet iñqırazı olğan bir vaqıtta Qırımnı Rusiyege qaytarmaq ğayesinen yaşağan bir sıra qırımlı siyasetçiler yüzlerindeki perdeni alıp taşlap, aqiqiy sıfatlarını kösterdiler.

Bu munasebetnen Qırım Yuqarı Şurası Prezidiumınıñ azaları, ayrıca Klıçnikov ve Tsekov cenaplarğa teşekkür bildirmek kerek. Olar toplaşuvda yapqan çıqışlarında sırlarını faş ettiler. Meger muhtariyetniñ bugünki statusı 1991 senesi aşıq-acele yalıñız qırımtatar halqınıñ milliy-territorial muhtariyet aqqına qarşı degil de, Ukraina ve ukrain halqınıñ serbest inkişafına daimiy telüke sıfatında özüne has bir sed olaraq çekilgen eken”, – dep saya R.Çubarov.

Meclis reisi, Qırım Yuqarı Şurası “Kurultay-Ruh” fraktsiyasınıñ başı Refat Çubarov şuña da diqqatnı celp ete ki, diger taraftan Qırım vaziyeti yani daa doğrusı Qırım Yuqarı Şurası Prezidiumınıñ bazı azalarınıñ qomşu devletke yaltaqlanğanları Qırım statusını acele sürette deñiştirmek kerekligini kösterdi. Tek bu alda qırımtatar halqınıñ öz-özüni belgilev aqqı ayaq astına alınmaz.

“Qırım Yuqarı Şurası Prezidiumı azalarınıñ soñki beyanatları, şu cümleden “qoltutuv, yardım ve qorçalav aqqında” ricalar perdesi artında gizlengeni alda aqiqatta Rusiye Federatsiyasınıñ açıqtan-açıq qarışmasınıñ zarurlığı aqqındaki fikirleri bildirilgende Qırımtatar halqı Meclisiniñ Qırım Yuqarı Şurasınıñ mevcut erkânını tarqatıp, Qırım Yuqarı Şurası deputatlarını saylav aqqında yañı saylav, Qırımnıñ tamır halqı olğan qırımtatarlarnıñ kefaletli vekâletligini közde tutqan qanunı esasında müddetinden evel saylavlar keçirmek teklifi ep aktualleşmekte”, – dep qayd ete R. Çubarov.

Soñunda Refat Çubarov diger teklifler, cümleden Qırım Yuqarı Şurası reberleri yanında nasıldır bir muzakereci organ sıfatında “milletler şurası” nı meydanğa ketirmek kibi naftalin qoqusı kelgen teklifler Qırımnı birlikte idare etmek ve Qırımnıñ kelecegi içün Qırımnıñ bütün milliy cemiyetleri, şu cümleden qırımtatar halqı da, birlikte mesüliet taşımaq, qayğırmaq boyunca meseleniñ çeziminden qaçınmağa tırışuvdır.

“Yaqın kelecekte tamam böyle olacağına iç kimse şübelenmemesi kerek, – dep qayd ete Meclis reisi. – Ukraina bugünki iñqıraznı başından atqarıp serbest Avropa halqları ailesinde munasip yer alacağı da şübesizdir”.

Hatırlatamız ki, 2014 senesi fevral 4 künü Qırım Yuqarı Şurasınıñ Prezidiumı Qırım ve Ukraina anayasasına deñişme kirsetmekni teklif etip, yarımadada vaziyet kerginleşkeni taqdirde Rusiyege yardım sorap muracaat etmege azırlığını bildirdi. Ait qarar 2014 senesi fevral 4 künü Qırım

Yuqarı Şurasınıñ Prezidiumınıñ toplaşuvında alındı.