Meclis reisi Refat Çubarov Qırımda yaşağan Volgaboyu, Ural ve Sibir tatarlarını «İdel-Ural» milliy-medeniy merkezniñ yubileyinen hayırladı

25 Yanvar 2014

Yanvar 25 künü Aqmescitte “Alraid” birleşmesiniñ meclisler salonında Qırımda yaşağan Volgaboyu, Ural ve Sibir tatarlarını “İdel-Ural” milliy-medeniy merkezniñ 20 yıllığına bağışlanğan tantanalı tedbir olıp keçti.

“İdel-Ural” milliy-medeniy merkezniñ başı İlmir Temirgaliyevniñ daveti ile Milliy Meclis reisi Refat Çubarov ve onıñ muavini Zaur Smirnov tantanalı tedbirde iştirak ettiler.

“Qardaş halqlarnıñ birisinen böyle bayram tedbirinde bulunğanımızğa pek sevinemiz, – dedi çıqışınıñ başında Meclis reisi Refat Çubarov. – “İdel-Ural” teşkilâtı Qırımda bayağı mürekkep bir devirde meydanğa ketirildi ve epimiz o kergin vaqıtlarnı pek yahşı hatırlaymız. Bu devirde qırımtatar halqı öz tarihiy vatanına kütleviy sürette qaytıp başlağan edi. Ve bizim er birimiz tatar qardaşlarımıznıñ olsun Qazandan, olsun Qırımda yaşağan Volgaboyu, Ural ve Sibir tatarlarnıñ bizge köstergen qıymetli yardımlarını iç unutmamız ve daima minnetdar olurmız”.

Bugünde bugün Ukrainada 70 biñ insannı teşkil etken Volgaboyu, Ural ve Sibir tatarlarına muracaat eterken Meclis reisi R. Çubarov çeşit milletler yaşağan Qırım yarımadası barışıq ve çeçeklenüvge lâyıqtır, dedi. Bu ise Qırım sakinleriniñ birligine bağlıdır.

“Öz Vatanına qaytqan ve aqlarınıñ tiklenmesi içün küreşken qırımtatar halqı qardaşları ve dostlarınıñ qoltutmasına inana, – dedi R. Çubarov Volgaboyu, Ural ve Sibir tatarlarına hıtap eterek. – Qırım yarımadasında barışıq oğrunda daima beraber olurmız”.

Meclis adından Refat Çubarov ve onıñ muavini Zaur Smirnov “İdel-Ural” milliy-medeniy merkezniñ başı İlmir Temirgaliyevke rusiyeli tarihçı Valeriy Vozgrinniñ “Qırımtatarlar tarihı” kitabını bahşış etti.