Meclis reisi Refat Çubarov Qarasuvbazarda cami qurulacaq yerni ziyaret etti

26 Noyabr 2013

Qırımtatar halqı Meclisiniñ reisi Refat Çubarov, Meclisniñ Qırımtatar tilinde tasil ve qırımtatar tilini Qırımnıñ devlet ve cemaat ömüriniñ bütün saalarına tadbiq etüv meseleleri boyunca idaresiniñ başı Emine Avamileva Bekir Çoban zade fondınıñ direktorı, Qurultay delegatı Remzi Velilâyev ile birlikte Qarasuvbazarda cami qurulacaq yerni ziyaret ettiler.

Qarasuvbazarda cami qurucılığınıñ teşebbüsçilerinden biri Remzi Velilâyevniñ aytqanına köre qurucılıq suratı közde tutulğan müddetni ozmaqta.

“Eger böyle devam etecek olsa, cami 1,5 yıl içinde qurulır”, – dedi Remzi Velilâyev.

Hatırlatamız ki, 2013 senesi oktâbr 16-da Qurban bayramınıñ ekinci künü Qarasuvbazarda şeer camisi qurulacaq yerde Qırım musulmanlarınıñ müftisi acı Emirali Ablayev, Meclis yolbaşçıları iştirakinde ve qırımtatar cemaatçılığı, diaspora vekilleriniñ de bulunuvında tantanalı sürette kapsula ve temel taşını qoyuv merasimi keçirildi