Meclis reisi Refat Çubarov öz muavinleri ile iş toplaşuvı keçirdi

29 Noyabr 2013

2013 senesi 29 noyabr künü Meclis reisi Refat Çubarov öz muavinleri Zaur Smirnov, Ahtem Çiygoz, Nariman Celâl ve Ayder Acimambetov ile toplaşuv keçirdi. Toplaşuvda Meclis Kâtibiyetiniñ başı Dilâver Akiyev de iştirak etti.

Toplaşuv devamında Meclis yolbaşçısı dekabr ayında Meclis yolbaşçıları ve Qırım musulmanlarınıñ diniy idaresi iştirakinde Qırımnıñ 10 regionında keçirilecek seyyar kenişletilgen iş toplaşuvlarnıñ cedvelini seslendirdi.

“Yılnıñ soñki ayında biz regional ve yerli meclisler, yerli şuralarnıñ deputatları ve 6-ncı çağırılış Qurultay deputatları ile körüşip, meselelerniñ keniş dairesini muzakere etmekni planlaştıramız”, – dep añlattı R. Çubarov.

Bunıñ kibi de Meclis reisi Meclisniñ bütün idareleri ve hızmetleriniñ reberleri bu toplaşuvlarda mıtlaqa iştirak eteceklerine diqqatnı celp etti.

Bundan da ğayrı, toplaşuv iştirakçileri Aqmescitte dekabr 10-da İnsan aqları halqara kününe bağışlanğan Umumqırım mitingini keçirüv boyunca teşkiliy i şni muzakere ettiler.

Meclis reisi Zaur Smirnovğa hıtap eterek planlaştırılğan miting aqqında semetdeşlerimizni haberdar etmek içün oña regional ve yerli meclisler, yerli şuralarnıñ deputatları ve 6-ncı çağırılış Qurultay deputatları ile zarur iş keçirmekni avale etti.