Meclis reisi Refat Çubarov: «Men Qurultay delegatları saylağan Meclis erkânınen çalışmağa azırım»

27 Oktâbr 2013

Meclis reisi Refat Çubarov jurnalistlerge izaat berirken, Meclis işini faalleştirmek niyetinde olğan meselelerniñ üç blokını belgilep, olarnıñ amelge keçirilmesi içün yapacaq adımlarını seslendirdi.

Meclis reisi R. Çubarovnıñ aytqanına köre, o Ukraina akimlerinen dialognı pekitmek qararında. “Biz (qırımtatar halqı) öz toprağımızğa qaytıp keldik, amma 22 yıl içinde Ukraina qanunlarında tesis etilgen uquqiy istiqballerge malik degilmiz. Dialognı quvetlendirrmek, adım-adımnen ait qanunlarnıñ qabul etilmesi taba ketmek kerekmiz”, – dedi R. Çubarov, söz Qurultay, Meclis ve akimiyet arasında özara munasebetlerini qurmaq kerekligi aqqında ketkenini añlatıp.

“Biz öyle bir munasebet qurmalımız ki, bundan Qırımnıñ epsi sakinleri menfaatlar olsunlar, – dep devam etti Meclis reisi. – Soñki yıllarda böyle muntazam dialog olmağanı iç bir kimse içün sır degil. Bazı vazifeli şahıslarnıñ qırımtatarlarnıñ vekâletli organını körmemezlikke almaq, ayrı qırımtatarlar ile epizodik bağ qurmaq tırışuvları Qırım ükümeti içün faydalı olmadı, vaziyetni de eyileştirmedi”.

Bu munasebetnen R. Çubarov ekinci mesele olaraq Qırım akimiyeti ile muntazam dialog qurmaqnı köre. “Biz dialog içün açıqmız, dialogğa azırmız, – dedi Çubarov. Bunıñnen birlikte o, şunı da qayd etti ki, Qurultay qırımtatarlarnıñ lideri Mustafa Cemilevniñ mahsus vekâletlikleri boyunca Qurultay qarar alğanından memnün. Qırımtatar halqınıñ aqları boyunca Halqara forumğa azırlıq boyunca iş Mustafa Cemilev ile birlikte alıp barılacaq.

Meclisniñ yañı reisi emiyet berecek üçünci problem – qırımtatarlarnıñ kendi aralarında, çeşit teşkilâtlar arasındaki bağlarnı mükemmelleştirmektir.
“Biz çalışuvnıñ, özlerini Meclis ve Qurultayğa muhalif olaraq açıqtan-açıq köstergen qırımtatarlarnen bile umumiy printsiplerini tapmağa tırışacaqmız”,- dedi Çubarov.

R. Çubarovnıñ sözlerine köre Qurultay sessiyasınıñ eki iş künü qırımtatar halqı milliy qurultayğa ne derecede qoltutqanı ve yüksek emiyetini kösterdi. “Zanımca, muhalifet de pozitsiyalarnı birleştirmek içün birinci adımlarğa azır”, – Meclis reisi böyle fikirni ifade etti.

Bundan da ğayrı Meclis reisi Refat Çubarov özüniñ birinci muavini vazifesine namzetlerni belgilevde belli beklentileri mevcut olğanını söyledi. “Şunı söyleye bilem ki, bu insan Qurultaynıñ yañı delegatlarından olabilir, eger de o seçimlerde yüksek reyting qazansa”, – dedi Çubarov ve saylanılğan bir insan olaraq Meclisniñ Qurultay tarafından seçilgen er angi erkânınen çalışacaq.

“Er alda men Mecliste er kes öz vazifelerini professional ve ştat esasında eda etkenlerini ve olarnıñ arasında çoqça gençler olmasını ister edim, – dep qayd etti Meclis reisi Refat Çubarov.