Meclis reisi Refat Çubarov Aluşta regional meclis ofisini ziyaret etti

11 Dekabr 2013

Meclis reisi Refat Çubarov öz muavini Zaur Smirnov, Meclis kâtibiyetiniñ başı Dilâver Akiyev ve Meclis azası Abduraman Egiznen beraber 11 dekabr künü Aluşta regional meclisiniñ reisi Enver Arpatlınıñ daveti ile Aluşta regional meclis ofisini ziyaret ettiler.

Enver Arpatlınıñ bildirgenine köre Aluştada B. Hmelnitskiy soqağındaki 11-nci evde yerleşken regional meclisniñ ofisi 2012 senesi sentâbr ayından itibaren çalışmaqta ve er kün saat 10.00-den 17.00-ge qadar açıqtır.

“Birleşip binanıñ tamirini yaptıq, ve endi mında meclisniñ körüşüvleri ve toplaşuvlarını yapmaq içün, bunıñ kibi de semetdeşlerimizni qabul etken odalar da bar, – dey Arpatlı. – Ofisni zarur tehnika ve milliy nesnelernen donattıq”.

Meclis reisi Refat Çubarov Aluşta regional meclis reisi ve azalarınen körüşüvi devamında olarğa ofis açmaq ve donatmaq kibi işlerni öz küçlerinen yapqanları içün teşekkür bildirip, semereli ve mahsuldar çalışmalar tiledi.

Onıñ aytqanına köre regional meclisniñ öz ofisi olğanı semetdeşlerimizniñ bir çoq meselelerini çezüvde yardım ete, çünki olar öz problemlerinen er zaman qayda baracaqlarını bileler.

Adetimiz boyunca Aluşta regional meclis azaları musafirlerni qave ve tatlılarnen sıyladılar.

Hatırlatamız ki, dekabr 11 künü Meclis yolbaşçıları ve idare reberleriniñ Qırımtatar halqı Qurultayınıñ delegatları, yerli milliy idare organları, maalliy şuralarnıñ deputatları ve Aluşta ve Yalta regionı musulman cemiyetleriniñ reislerinen regionlarara toplaşuvı olıp keçti.