Meclis reisi Qırımtatarlarnıñ problemleri boyunca halqara forum 2014 senesiniñ baarinde keçirilmek kerekliginde emin

19 Sentâbr 2013

Sentâbr 19 künü Qırımda Ukraina Tış işleri naziri Leonid Kojara, Qırım Nazirler Şurası ve Meclis yolbaşçılarınıñ Avropa Birliginiñ Kenişletüv ve Avropanıñ eyiqomşulıq siyaseti meseleleri boyunca komissarı Ştefan Füle ile olıp keçken körüşüvde Meclis reisi, Ukraina halq deputatı Mustafa Cemilev tögerek masa iştirakçilerine bir qaç aydan soñ yani 2014 senesi mayıs 18 künü qırımtatarlarnıñ tarihiy Vatanlarından sürgün etilgenine tamam 70 yıl tolacağını hatırlattı.

“Bütün bu yıllar yaşamaq, ayaqta qalmaq, Vatanğa qaytmaq ve aqlarımız içün küreşte keçti, – dep qayd etti Meclis başqanı. – Qırımtatarlar içün ayrıca emiyetke nail olğan bu künde Aqmescitniñ merkeziy meydanı biñlernen insanlarnen tolur. Ve biz böyle künde toplanğan insanlarğa olarnıñ milliy meseleleriniñ çezimine dair ümüt berici bir haber söylemek isterdik”.

Mustafa Cemilevniñ fikrince böyle ümüt berici haber Avropa Birligi ve OSCE imayesinde Halqara forum keçirilmesi aqqında qarar olabilir edi. “Biz bu forumnı sürgünlikniñ 70 yıllığı arfesinde yani kelecek yılnıñ mart-aprel aylarında keçirmekni teklif etemiz, – dedi Meclis başqanı Mustafa Cemilev