Meclis reisi, Qırım Yuqarı Şurasınıñ «Kurultay-Ruh» fraktsiyasınıñ başı Refat Çubarov fevral 18 künü Kiyevde elâk olğanlarnıñ yaqınlarına taziye bildirdi

19 Fevral 2014

Fevral 19 künü 6-ncı çağırılış Qırım Yuqarı Şurasınıñ nevbetteki toplaşuvında Meclis reisi, Qırım Yuqarı Şurasınıñ “Kurultay-Ruh” fraktsiyasınıñ başı Refat Çubarov Kiyevde ve Ukrainanıñ bir sıra regionlarında kergin vaziyet munasebetinen Meclisniñ fevral 18 künü qabul etken Beyanatınen çıqışta bulundı. Regionlar partiyası deputat fraktsiyası deputatlarınıñ bir qısmı Çubarovnıñ çıqışını ayaqlarınıñ tapırdısınen bastırmağa tırıştı.

Lâkin R. Çubarov buña qulaq asmadan öz meslekdeşlerini Meclis beyanatınen tanış etti. Soñ memlekette ve Qırımdaki vaziyet hususında öz fikrini bildirip, Qırım Yuqarı Şurasınıñ başı V. Konstantinovnıñ Yuqarı Şuranıñ “Qurultay-Ruh” fraktsiyası adına muracaatına seslendi.

“Qırım Yuqarı Şurası reisiniñ areketleri ve fikirlerinde nasıldır mantıq olmağanını, insanlarnı “bizimkiler” ve “yabandcılar”ğa bölgenini endi çoqtan közetem, – dedi R. Çubarov. – Belli olğan malümatlarğa köre Kiyevde fevral 18-de 30-ğa yaqın adam elâk olğan.

B u faciadır. Bu insanlarnıñ angi regionından, angi siyasiy yönelişke meyil bergeni ve nasıl statusqa malik olğanınıñ menim içün iç bir türlü emiyeti yoqtır… Felâket yüz berdi, onlarnen insan öldürildi. Kiyevde elâk olğanlarnıñ aile ve yaqınlarına menim fikirime qoltutqan meslekdeşlerim adından teren taziye bildirem. Bu insaniyetliktir. Bu hristancasına, bu musulmancasına, bu yeudiycesine ve daa nasıl isteseñiz öyledir. Bu birinciden.

Ekincide, Qırım Yuqarı Şurası ayrı deputatlarğa milliy mensüpliklerine köre hıtap eterek, olarnı devlet yapması borclu işlerni eda etmegenlerinde qabaatlağanında aslı da mantıq yoqtır. Ebet, biz, qırımtatar deputatları, insanlar bizden beklegen işlerniñ çoqusını yapıp olamadıq. Ya bizlerden iç birimiz şu devletniñ idare etilmesine yaqın qoyuldıqmı?”

Qırım parlamenti başına hıtap eterek Refat Çubarov bir siyasiy baqışları, demokratik fikirleri olğan insanlarnı qabaatlav da mantıqsız olğanını qayd etti.
Meclis reisi bir sıra qırımlı siyasetçileriniñ keçişimi ve olarnıñ biznes menfaatları sebebinden sağğa-solğa sallanğanlarını izaatlamaycağını da söyledi.

“Men çoq şeyni hatırlayabilirim. Biznesiñiz vaziyetine köre siyasiy baqışlarıñıznı deñiştirebergeniñiz aqqında söylemege istemeyim”, dedi Çubarov.